केटासंग लज गएकी १७ वर्षिय किशोरीको हत्या, युवक फरार

बुटवल । केटा साथीसँग लजमा गएकी १७ वर्षीय किशोरीको मृत्युको घटना बलात्कारपछि हत्या भएको भन्दै प्रहरीमा उजुरी परेको छ । पश्चिम नवलपरासी रामग्राम नगरपालिका वडा नं १२ की १७ वर्षीय किशोरीलाई पूर्वी नवलपरासी विनयी त्रिवेणी गाउँपालिका–६, त्रिवेणीमा रहेको होटेल शाही प्यालेसमा लगेर बलात्कार पछि हत्या गरेको भन्दै किशोरीका बाबुले प्रहरीमा उजुरी दिएका हुन्।किशोरीका बाबुले होटलमा लैजाने १७ वर्षीय किशोरको विरुद्ध बलात्कार र कर्तव्य ज्यान मुद्वामा उजुरी दर्ता गरेको जिल्ला प्रहरी कार्यालय नवलपुरका डिएसपी दिलीपकुमार गिरीले बताए।

गत साउन २२ गते बलात्कार र हत्याका आरोपित किशोरले १७ वर्षीय किशोरीलाई त्रिवेणीमा रहेको होटेल शाही प्यालेसमा लिएर गएको केही बेरमा किशोरीको स्वास्थ्यमा समस्या आएको भन्दै सहिद स्मृति अस्पताल चौपत्ता पुर्‍याएको अनुसन्धानबाट खुलेको डिएसपी गिरीले बताए।

अस्पताल पुर्‍याएको केही समयमै अस्पतालले किशोरीलाई मृत घोषणा गरेको थियो । किशोरीको मृत्यु लगत्तै फरार भएका किशोरलाई अझै पनि प्रहरीले पक्राउ गर्न सकेको छैन ।मृतक किशोरीका बुबाले पश्चिम नवलपरासी प्रहरीमा दिएको उजुरी आफुहरुकोमा आएको र घटनाको अनुसन्धान भइरहेको जिल्ला प्रहरी कार्यालय नवलपुरका डिएसपी दिलीपकुमार गिरीले बताए।

गिरीका अनुसार मृत किशोरीको बुटवल स्थित लुम्बिनी प्रादेशिक अस्पतालमा पोस्टमार्टम गरिएको र शव परिवारलाई हस्तान्तरण गरिएको छ । प्रहरीले आफ्नो तर्फबाट अनुसन्धान हत्या भएकै दिनबाट सुरु गरेको, होटल सञ्चालक तथा फरार किशोरका साथीहरू र किशोरले प्रयोग गरेको मोटरसाइकल धनीसँग यस अघि नै सोधपुछ गरिएको र पोस्टमार्टम रिपोर्ट आए पछि थप कुराहरू बताउन सकिने गिरीले बताए। मृतक र आरोपित दुवै किशोर किशोरी भएकाले नाम उल्लेख गर्न नमिल्ने प्रहरीले जनाएको छ।