बाँके । बाँकेस्थित भेरी अस्पतालका चिकित्सकमाथि आक्रमण गर्नेविरुद्ध प्रहरीले ज्यान मार्ने उद्योग गरेको कसुरमा मुद्दा चलाएको छ । बिहीबार राति नेपालगञ्जस्थित भेरी अस्पतालमा दाङका एक सङ्क्रमितको उपचारका क्रममा मृत्यु भएपछि आफन्तले स्वास्थ्यकर्मीमाथि आक्रमण गरेका थिए ।
गत जेठ ४ गते अस्पतालमा भर्ना भएका दाङका कोरोना सङ्क्रमित बिरामी अवस्था गम्भीर भएपछि चिकित्सकले भेन्टिलेटरमा राखेर उपचार गर्ने क्रममा गए राति करिब ८ बजे मृत्यु भएपछि स्वास्थ्यकर्मीको लापरवाहीले मृत्यु भएको भन्दै आफन्तले आक्रमण गरेका थिए । आक्रमणमा परि डा। चन्द्रप्रकाश साहु र नर्सहरू अस्मिनी गुरुङ र सदीक्षा गैरै घाइते भएका थिए । आक्रमणमा संलग्न दाङको तुलसीपुर घर भएका मानबहादुर रावत, भरत रावत र लोकराज रावतलाई प्रहरीले पक्राउ गरेको छ ।
पक्राउ परेका तीन जनाविरुद्ध ज्यान मार्ने उद्योगको कसुरमा मुद्दा दर्ता गरेर अनुसन्धान शुरु गरिएको लुम्बिनी प्रदेश प्रहरी कार्यालयका डीआईजी रवीन्द्र धानुकले जानकारी दिए । घटनाको छानबिन गर्न बाँकेका सहायक प्रमुख जिल्ला अधिकारी शंकरबहादुर विष्टको नेतृत्वमा छानविन समिति पनि बनाइएको छ ।
सुरक्षाको ‘ग्यारेन्टी’पछि काममा फर्किए स्वास्थ्यकर्मी
अहिले चिकित्सक र नर्सहरु काममा फर्किएका छन् । प्रहरीले सुरक्षाको ‘ग्यारेन्टी’ गरेपछि आन्दोलित सबै चिकित्सक र नर्सहरु काममा फर्किएको अस्पताल प्रशासनले जनाएको छ । साथै, अस्पतालमा प्रहरी निरीक्षकको कमाण्डमा २५ जनाको टिम परिचालन गरिएको डीआईजी धानुकले बताए । चिकित्सक र नर्सहरुको सुरक्षार्थ सो टोली खटाइएको उनले बताए ।
युनिकोड
मिति रूपान्तरण
ग्लोबल आवाज
प्रतिक्रिया