ट्रंकलाइन विलिङ्गको महशुल खारेज गर्न संघको आग्रह

बुटवल । बुटवल-भैरहवाका विभिन्न स्थानमा संचालन भइरहेका उद्योगहरुलाई विद्युत प्राधिकरणले ट्रंकलाइन सरह विलिङ्ग गरी बक्यौता शुल्क बुझाउन ताकेता गरेपछि रुपन्देही उद्योग संघले विरोध जनाएको छ । २०७२ सालदेखिको ट्रङ्क लायइन विलिङको बक्यौता बुझाउन प्राधिकरणले उद्योगहरुलाई ताकेता गरेपछि उनिहरुले समस्या समाधानको माग गर्दै ध्यानाकर्षण गराएका छन् ।

Advertisement

संघले उद्योगीहरुको माग र सहमती विनै नेपाल प्राधिकरणले एकलौटी ढंगबाट लागु गरेको विलिङ्ग उद्योगी माथि अन्याय भएको ठहर निकालेको छ । रुपन्देही उद्योग संघका पदाधिकारी तथा प्रभावित उद्योगीहरुसँगै नेपाल विद्युत प्राधिकरण प्रदेश ५, प्रादेशिक कार्यालयमा डेलिगेसन गएको छ । संघका अध्यक्ष बाबुराम बोहोराको नेतृत्वमा गएको डेलिगेसन टोलीले प्रदेश कार्यालयका प्रमुख ईन्जिनियर नवराज सुवेदीसँग भेट गरी ट्रंक लाइन विलिङ्गको रकम उद्योगीले कुनै पनि हालतमा तिर्न नसक्ने हुँदा तत्काल समस्या समाधान गर्न अनुरोध गरेको छ । प्राधिकरणको यस्तो व्यवहारले औद्योगिक वातावरण खलबलिएको हुँदा यस विषयमा गम्भिर बनिदिन समेत संघले आग्रह गरेको छ ।

राष्ट्रिय सभाका प्रमुख सचेतकसँग छलफल

रुपन्देही उद्योग संघले बुटवल-भैरहवाका विभिन्न क्षेत्रका उद्योगीहरुलाई ट्रंक लाइन विलिङ्गले उत्पन्न गरेको समस्या सम्बन्धमा राष्ट्रिय सभा सत्तापक्षका प्रमुख सचेतक खिमलाल भट्टराईसँग छलफल गरेको छ । संघको सचिवालयमा भएको छालफलमा अध्यक्ष बोहोराले नेपाल विद्युत प्राधिकरणले एकतर्फी ढंगबाट गरेको अन्यायपूर्ण व्यवहारले उद्योगीहरु आक्रान्त बनेको बताउँदै तत्काल समस्या समाधान गर्न आग्रह गर्नु गरे ।

उद्योगीका समस्या सम्बन्धमा संघका पूर्व अध्यक्ष नेपाल उद्योग परिसंघ प्रदेश नं. ५ संयोजक एजाज आलम, अध्यक्ष परिषदका संयोजक पूर्व अध्यक्ष सतिशचन्द्र कसौधन, उद्योगी चन्द्रमान श्रेष्ठ, देवेन्द्र साहु लगायतले समस्याबारे जानकारी गराएका थिए । उद्योगीहरुसँगको छलफलमा सचेतक भट्टराईले उनीहरुले भोगेका समस्या समाधानका लागि तत्काल पहलकदमी गर्ने प्रतिवद्धता व्यक्त गरे ।