एसियन च्यालेन्जर ट्रफी क्रिकेटः राइनोज र शंकरनगर विजयी

भैरहवा । रुपन्देहीको भैरहवामा जारी अन्तरदेशीय एसियन च्यालेन्जर ट्रफी (क्लब) क्रिकेट प्रतियोगिता अन्तर्गत बुधबार भएको सेमिफाइनल अन्तर्गतको खेलमा राइनोज क्रिकेट क्लब काठमाण्डौ र शंकरनगर क्रिकेट क्लब रुपन्देही विजयी भएका छन् । राइनोजले असरक ग्लोबल स्पोर्टस् बंगलादेशलाई ९ विकेटले र शंकरनगरले वेस्टर्न क्रिकेट क्लब बुटवललाई ४४ रन पराजित गरेको हो ।

टस जितेर व्याटिङ गरेको असरक स्पोर्टस्ले २० ओभरमा १० विकेट गुमाउँदै ११६ रनको योगफल बनायो । उसका लागि अली समाद र ओस्कर कोल्कले ३०/३०, डान रोर्बट्सले २४ र एमबीए चौधरीले १३ रनको योगदान गरे । बलिङमा राइनोजका कमलसिंह ऐरी, सुर्य तामाङ र गजेन्द्र बोहराले ३/३ विकेट लिए । जवाफमा राइनोज क्रिकेट क्लबले १० ओभरमा १ विकेटको क्षतिमा ११७ रन बनायो । उसका लागि लोकेश बमले ९० तथा रोहित कुमार पौडेल र गजेन्द्र बोहराले ११/११ रनको योगदान गरे । बलिङमा असरकका हर्पित चोपराले १ विकेट लिए । खेलमा राइनोजका लोकेश बम म्यान अफ द म्याच घोषित भए । दोस्रो खेलमा टस जितेर व्याटिङ गरेको शंकरनगरले निर्धारित २० ओभरमा ७ विकेट गुमाउँदै १३५ रनको योगफल बनायो । उसका लागि सौरभ खनालले ५९ (नटआउट), साहब आलमले २५, दुर्गेश गुप्ताले १३ (नटआउट) र शंकर रानाले १० रनको योगदान गरे । बलिङमा वेस्टर्नका विक्रम सोबले ३, कृष्ण कार्कीले २ तथा बसन्त रेग्मी र हर्जित सिंहले १/१ विकेट लिए । जवाफमा वेस्टर्नले १९ ओभरमा १० विकेट गुमाउँदै ९१ रन बनायो । उसका लागि कुशल भुर्तेलले २३, बसन्त रेग्मीले १४ र विक्रम सोबले १० रनको योगदान गरे । बलिङमा शंकरनगरका साहब आलमले ४, विक्रम भुसालले ३ तथा दुर्गेश गुप्ता, सन्दिप सुनार र अनिल खरेलले १/१ विकेट लिए । खेलमा शंकरनगरका साहब आलम म्यान अफ द म्याच घोषित भए ।

बिहीबारकोे फाइनल खेल राइनोज क्रिकेट क्लब काठमाण्डौ र शंकरनगर क्रिकेट क्लब रुपन्देहीबीच हुने रुपन्देही क्रिकेट संघका अध्यक्ष प्रशान्त विक्रम मल्लले बताए । भैरहवा क्वीन्स प्रा.लि.को आयोजना, राइनो स्पोर्ट्सको संयोजन तथा रुपन्देही क्रिकेट संघको प्राविधिक सहयोगमा भैरहवास्थित सिद्धार्थ रंगशालामा सञ्चालित अन्तरदेशीय टी–ट्वान्टी प्रतियोगितामा नेपालसहित भारत, बंगलादेश पाकिस्तानका गरी ८ वटा व्यवसायिक क्लबले प्रतिष्पर्धा गर्दैछन् । प्रतियोगिताको ह्वाक नेपाल, कामना सेवा बैंक, स्प्यारो एसएमएसले प्रायोजन गरेको छ । प्रतियोगिताको विजेताले ३ लाख नगद पुरस्कार पाउनेछ ।