तीनकुनेमा बसले मोटरसाइकल र भ्यानलाई ठक्कर दियो : एक युवतीको मृत्यु, ३ घाइते

काठमाडौं । काठमाडौंको तीनकुनेमा सवारी दुर्घटना हुँदा एकजनाको मृत्यु भएको छ । बिहान साढे ६ बजे तीनकुनेस्थित मुनिभैरबअगाडि सडकखण्डमा दुर्घटना हुँदा एकजनाको मृत्यु भएको हो । 

मृत्यु हुनेमा मोटरसाइकलको पछाडि सवार नुवाकोट स्थायी घर भएकी नगिना तामाङ रहेको प्रहरीले जनाएको छ । ट्रमा सेन्टरमा उपचारका लागि लगिएकोमा उनलाई चिकित्सकले मृत घोषणा गरेका थिए । 

मोटरसाइकलका चालक रामेछापका पदम थापा मगरको दाहिने हातमा चोट लागेको छ । उनको ट्रमा सेन्टरमा उपचार भइरहेको एसपी अपिलराज बोहराले जानकारी दिए । दुर्घटनामा क्रमशः काभ्रे र दोलखाका रत्नबहादुर शार्की र मेनुका बुढाथोकी घाइते भएका छन् । उनीहरूको कान्तिपुर अस्पतालमा उपचार भइरहेको छ ।

कोटेश्वरदेखि बानेश्वर आइरहेको बा ३ ख ७०६२ नम्बरको बसले सोही दिशाबाट आइरहेको बा.प्र.०१-०२६ च २९२७ नम्बरको मारुती भ्यान र सोही दिशाबाट आइरहेको बा.प्र.०२-०५३ प ३८४७ नम्बरको २२०अ को मोटरसाइक आपसमा ठोक्किँदा दुर्घटना भएको हो ।