ताजा अपडेट »

एमाले सचिवालयको निर्णय : असोज ३ गते ७ वटै प्रदेशमा संविधान दिवस मनाउने

विहीबार, १४ भदौ २०८०, ०८ : ५३
52 Shares
विहीबार, १४ भदौ २०८०
52 Shares

बुटवल । नेकपा (एमाले)को बुधबार सिराहाको सर्रे अम्बासमा बसेको सचिवालयको २५ औं बैठकले संविधान जारी भएको दिन, असोज ३ गते सातवटै प्रदेशमा कार्यक्रम आयोजना गर्ने निर्णय गरेको छ । संविधान जारी भएको ऐतिहासिक दिनको अवसर पारेर सातै प्रदेशमा कार्यक्रम आयोजना गर्ने निर्णय गरेको एमालेले जनाएको छ ।

एमालेले दशैं र तिहार पर्वको बीचमा पोलिट्ब्युरो बैठक गर्ने निर्णय गरेको छ। मंसिरमा केन्द्रीय कमिटी बैठक राख्ने र बैतडीको झुलाघाटदेखि पाँचथरको चिवा भञ्ज्याङसम्म पुष्पलाल मध्यपहाडी राजमार्ग केन्द्रित अभियान सञ्चालन गर्ने निर्णय गरेको छ। मंसिरमा धनगढीमा केन्द्रीय कमिटी राख्ने र त्यसले पुष्पलाल मध्यपहाडी राजमार्ग केन्द्रित अभियानको योजना बनाउने पनि एमालेले बताएको छ।

२०७३ फागुन २१ देखि चैतको ९ गतेसम्म एमालेले मेची-महाकाली अभियान चलाएको थियो। अहिले मध्यपहाडी राजमार्गमा त्यस्तै युवालक्षित अभियान चलाउन लागेको हो।

एमालेले काठमाडौं बाहिर  केन्द्रीय कमिटीको बैठक राख्ने र केन्द्रीय सदस्यहरूलाई फरक भूगोलसँग साक्षात्कार गराउने नीति लिएको छ। यसअघि झापाको दमकमा पाँचौं केन्द्रीय कमिटीको बैठक आयोजनाको तयारी गरेको थियो। तर, कोशीमा पहिचानको आन्दोलन चर्किएकाले वैशाख २८ देखि ३० गतेसम्म काठमाडौंमै केन्द्रीय कमिटी बैठक राख्यो।

एमालेले चौथो महाधिवेशन आयोजना भएको विष्णुपुरकट्टीको सर्रे अम्बासमा नजिकैको विद्यालयलाई मदन भण्डारीको नामबाट नामकरण गरी ३ लाखको अक्षय कोषसमेत खडा गरेको छ। विद्यालयको नाममा १८ कट्ठा जग्गा पनि खरिद गरेको छ। ‘अध्यक्ष केपी शर्मा ओलीले उहाँको पत्नी राधिका शाक्यको नामबाट तीन लाख रुपैयाँको अक्षय कोष स्थापना गर्नु भएको छ,’ सचिव योगेश भट्टराईले भने।

त्यस्तै चौथो महाधिवेशन भएको काठेघरलाई संरक्षण गर्न त्यहाँको १४ कट्ठा जग्गालाई मदन भण्डारीको पार्कको नाममा खरिद् गरिएको छ। बुधबार त्यहाँ नेपाल कम्युनिस्ट आन्दोलनको ७५ वर्ष पूरा भएको सन्दर्भमा हिरक स्तम्भको समेत शिलान्यास गरिएको छ।

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।