फोनिज प्रदेश ५ को प्रथम महाधिवेशनको तयारी पुरा

मंसिर १५,

ग्लोबल आवाज

बुटवल । नेपाल आदिवासी जनजाति पत्रकार महासंघ (फोनिज) प्रदेश ५ को प्रथम महाधिवेशनको तयारी पुरा भएको छ । सोमबार पाल्पा स्थित तिनाउँ गाउँपालिकामा हुने महासधिवेशनको तयारी पुरा भएको प्रदेश इन्चार्ज देव पचभैयाले जानकारी दिए । महाधिवेशनमा प्रदेश–५ का १२ वटै जिल्लाका करिब दुई सय भन्दा बढि प्रतिनिधि र पर्यवक्षेकहरु सहभागी रहने आयोजकले जानकारी दिएको छ ।

महाधिबेशनको उद्घाटन प्रदेश ५ सभा सदस्य पूर्ण बहादुर घर्तीमगरले गर्ने कार्यक्रम तय भएको प्रथम महाधिवेशन तयारी समितिका सदस्य सचिव सनु थापाले जानकारी दिए । आयोजकका अनुसार महाधिबेशनमा तिनाउँ गाउँपालिकाका प्रमूख ओम बहादुर घर्तीमगर,स्थानीय जनप्रतिनिधि, फोनिजका केन्द्रिय अध्यक्ष डण्ड गुरुङ्ग, पदाधिकारी समिति, पत्रकार महासंघ, प्रेस यूनियन, प्रेस संगठनका प्रदेश प्रमुखको सहभागीता रहने छ । प्रदेश सरकारले लुम्विनी भ्रमण वर्ष मनाइरहेको सन्दर्भमा आन्तरिक पर्यटकलाई टेवा पुग्ने उद्देश्यका साथ पाल्पा स्थित तिनाउँ गाउँपालिका सुकेतालमा रहेको मगर होमस्टेमा महाधिवेशन गर्न लागिएको आयोजकले जनाएको छ ।

आदिवासी जनजातिका क्षेत्रमा क्रियाशील आदिवासी जनजाति पत्रकारहरुलाई एकसुत्रमा आवद्व गरी व्यावसायिक नेतृत्व प्रदान गर्ने र पेशागत हक, हितको संरक्षण गर्ने उद्धेश्यले गठन भएको नेपाल आदिवासी जनजाति पत्रकार महासंघ (फोनिज) मा जातीय पत्रकारहरुको संस्था आवद्ध रहेका छन् ।