पत्रकार महासंघ लुम्बिनी प्रदेशले भालुवाङमा भवन निर्माण गर्ने

बुटवल । नेपाल पत्रकार महासंघ लुम्बिनी प्रदेशको भवन स्थायी राजधानी भालुवाङमा बन्ने भएको छ । आईतबार भालुवाङमा महासंघ लुम्बिनी प्रदेशका अध्यक्ष बसन्त गिरीको अध्यक्षता, महासंघका केन्द्रीय उपाध्यक्ष उदय जीएमको प्रमुख आतिथ्यतामा बसेको बैठकले अर्घाखाँचीको शितगंगा नगरपालिकाबाट प्राप्त ३ रोपनी जग्गामा सुविधा सम्पन्न प्रदेश कार्यालय भवन निर्माण गर्ने निर्णय गरेको हो । भवन निर्माणको लागि अध्यक्ष गिरीको संयोजकत्वमा भवन निर्माण समिति गठन गरिएको महासचिव बिक्रम खड्काले जानकारी दिए ।

Advertisement

महासंघ लुम्बिनी प्रदेशको भवन निर्माणको लागि लुम्बिनी प्रदेश सरकारले आर्थिक वर्ष २०७८/०७९ मा ५० लाख बजेट विनीयोजन गरेको छ । बैठकले भवन निर्माणका लागि जग्गा उपलब्ध गराउने शीतगंगा नगरपालिका र पहल गर्ने महासंघको अर्घाखाँची शाखाप्रति धन्यवाद तथा आभार प्रकट गरेको छ ।

बैठकले प्रदेशभित्रका सबै पत्रकारहरुको दुर्घटना विमा गर्ने, पत्रकार कल्याणकारी कोष स्थापना गर्ने, अन्तर्राष्ट्रिय मिडिया सम्मेलन लुम्बिनीमा आयोजना गर्ने पनि निर्णय गरेको महासचिव खड्काले बताए । त्यसैगरी रुकुम पूर्वमा मंसिर मसान्तसम्म महासंघको शाखा गठन गर्ने, प्रदेशसभामा पेश भएको सन्चारसम्बन्धी विधेयक तत्काल फिर्ता गरि पुनर्लेखन गर्न प्रदेश सरकारसँग माग गर्ने लगाएतका निर्णय गरिएको खड्काले जानकारी दिए । बैठकले प्रदेश समितिका सदस्य विन्दुकुमार चौहानको निधनप्रति शोक प्रस्ताव पारित गरेको छ ।

विभिन्न ५ विभागहरु गठन

पत्रकार महासंघ लुम्बिनी प्रदेशले विभिन्न ५ विभागहरु गठन गरेको छ । आज बसेको बैठकले संगठन विभागको संयोजकमा महासचिव विक्रम खड्कालाई चयन गरेको छ । यस्तै प्रकाशन विभाग संयोजक केशरमान बुढाथोकी, अनुशासन विभाग संयोजक शुक्रऋषि चौलागाईं, महिला विभाग संयोजक चुमा आचार्य, समावेशी विभाग संयोजक शिव सुनारलाई चयन गरेको छ । प्रकाशन विभागले ‘लुम्बिनीको पत्रकारिता’ नामक इतिहास लगायतका पुस्तक प्रकाशन गर्नेछ ।