अहिलेको राष्ट्रिय संकट नयाँ पुस्ताका लागि अवसर : शंकर पोखरेल

बुटवल । लुम्बिनी प्रदेशका मुख्यमन्त्री तथा नेकपा स्थायी कमिटी सदस्य शंकर पोखरेलले अहिलेको राष्ट्रिय संकट नयाँ पुस्ताका लागि अवसर भएको बताएका छन् । आगामी वैशाखमा हुने निर्वाचनले पुरानो नेतृत्वलाई विस्थापित गर्दै नयाँ पुस्तालाई नेतृत्वमा पुग्नका लागि सहयोग गर्ने उल्लेख गरे ।

राष्ट्रिय युवा संघले मँगलबार बुटवलमा आयोजना गरेको भेलालाई सम्बोधन गर्दै पोखरेलले लिपुलेक सहितको नेपालको चुच्चे नक्साको विषयले संसदमा प्रवेश पाएसँगै प्रधानमन्त्री केपी शर्मा ओलीलाई घेराबन्दीमा पारिएको आरोप लगाए । आफ्नै पार्टीका नेताहरुबाट प्रधानमन्त्रीलाई घेराबन्दीमा पारेपछि संसद विघट गरिएको प्रस्ट्याउँदै उनले भने ‘नेपालको चुच्चे नक्कासाको विषयले जब संसदमा प्रवेश पायो, प्रधानमन्त्रीलाई घेराबन्दी सुरु भयो, त्यसैका कारण आज यो परिणाममा पुग्नु पर्यो ।’

प्रधानमन्त्री र पार्टी अध्यक्षको पदका लागि दाहाल-नेपाल पक्षले सरकारले कुनै काम गर्न नसकेको भन्दै प्रश्न उठाउने गरेको उनले बताए । विगतमा प्रधानमन्त्री भएकाहरुले नै सरकारका बारेमा प्रश्न उठाउने गरेको भन्दै उनले भने ‘आफ्नो पालामा माखो मार्न नसक्नेहरुले नै ओलीले केही गर्न सकेन, सरकारले केही गर्न सकेन मनेर प्रश्न उठाउने हो ?’ हाल-नेपाल पक्षले अध्यक्ष ओलीलाई कारबाही गरी पार्टीबाट निस्कासन गरेको प्रसँगमा बोल्दै उनले भने-‘आगामी वैशाखमा हुने निर्वाचनले देखाउने छ, कसले कसलाई कारबाही गर्ने भनेर ।’