सैनामैनाका असोक घिमिरेलाई बचाउन कलाकर्मीको सकृयता

सैनामैना । करेन्ट लागेर गम्भिर घाइते भई उपचार गराइरहेका सैनामैना–६ पटनाका असोक घिमिरेको उपचारमा सहयोग गर्ने उद्देश्यले यस क्षेत्रका कलाकर्मीहरुले बचाउ अभियान संचालन गरेका छन् ।

वाइरिङ गर्ने क्रममा करेन्ट लागेर घाइते बनेका २५ बर्षिय घिमिरेको भैरहवा मेडिकल कलेज रुपन्देहीमा उपचार भैरहेको छ । गम्भिर अवस्थामा उपचार भैरहेको उनको उपचार खर्च अभाव भएपछि केही राहात होस् भन्ने उद्देश्यसहित सैनामैना मुर्गियामा संचालित नटराज कलाकेन्द्र र बुटवल मझुवामा रहेको नित्यम कलाकेन्द्रले संयुक्त आयोजनामा ‘असोक घिमिरे बचाउ अभियान’ संचालन गरेका हुन् ।

उपचार खर्च बढि लाग्नेभएपछि उनको परिवारले सहयोगको याचना गरका थिए । मानवता देखाउदै केही राहात होस् भनेर विभिन्न स्थानमा सांगेतिक प्रस्तुतिहरु देखाउदै आर्थिक रकम जुटाउने अभियान चलाइएको कलाकर्मी एवम् नटराज कला केन्द्रका संचालक बिक्रम रानाले बताए । सक्नेले सहयोग गरौ, घिमिरेको ज्यान बचाऔ भन्दै सडक सडकमा पुगेर सांगितिक माध्यमबाट रकम संकलन गर्दै आएको उनले बताए । करिब हप्तादिन अघिबाट सुरु गरिएको अभियानबाट पहिलो चरणमा १२ हजार १ सय ६० रुपैया संकलन गरि परिवारलाई हस्तान्तण गरिसकिएको उनले बताए ।

हप्तामा १/२ दिन समय मिलाएर दुबै कलाकेन्द्रमा प्रशिक्षण लिइरहेका विद्यार्थीहरु एवम् कलाकर्मीहरुको सहभागितामा विभिन्न चोक तथा सडकहरुमा गई आर्थिक रकम उठाइएको कलाकर्मी एवम् नित्यम कलाकेन्द्रकी संचालिका बबिता धितालले बताइन् । उनको उपचार खर्चमा राहात पुर्याउनका लागि यो अभियान जारी रहने कलाकेन्द्रले जनाएको छ । करिब १ महिना अघि, कामको शिलशिलामा वाएरिङ गर्ने क्रममा घिमिरेको करेन्ट लागी छतबाट खसेर गम्भिर घाइते हुन पुगेका हुन् । उनको कम्मरबाट तल्लो भागमा गम्भिर असर पुगेको छ । सामान्य पारिवारीक स्थिति भएका घिमिरेको भैरहवामा उपचार भैरहेको छ । उनको उपचारमा करिब १५ लाखसम्म लाग्ने परिवारले जनाएको छ ।

यसअघि विभिन्न संघसंस्थाहरुले अभियान चलाएका छन् । सत्य संजाल, टिम नेफो सैनामैना, आदिखोला ब्वाइज गु्रप, जेसिस सैनामैना, विदेशमा रहेका नेपालीहरुको सहयोग लगायतबाट आर्थिक संकलन जारी रहेको छ ।