बुटवलबाट दुई कोरोना संक्रमित सम्पर्कविहिन

सुरक्षा स्रोत भन्छ,मोबाइल लोकेशन जिल्लामा देखिएन

बुटवल । बुटवलमा कोरोना संक्रमण पुष्टि भएसँगै शनिबार दिउँसोदेखि सम्पर्कविहिन भएका २ जना पुरुषको अझै पत्ता लागेको छैन । लुम्बिनी प्रादेशिक अस्पतालको प्रयोगशालामा परीक्षणबाट कोरोना पुष्टि भएका उनीहरु पुष्टि भएको जानकारी पाए लगत्तै सम्पर्क बाहिर हुनु नेटवर्कको कारणले हो वा अन्य कारणले भन्ने बारे एकिन नभएको प्रदेश ५ जनस्वास्थ्य प्रयोगशाला प्रमुख डाक्टर राजेन्द्र गिरीले बताए ।

लुम्बिनी प्रादेशिक अस्पताल बुटवलको प्रयोगशालामा शुल्क तिरेर शुक्रबार स्वाब संकलन गरिएकोमा उनीहरुको रिपोर्ट पोजेटिभ आएको र पोजेटिभ रिपोर्ट आएको पहिलो सूूचना पाएसँगै सम्पर्क बाहिर गएका हुन्। बुटवल उपमहानगरपालिका वडा नं.६ ठेगाना जनाएका उनीहरूले दिएको एनसेल नम्बरमा सम्पर्क नभएको हो । सम्पर्क बाहिर गएपछि स्थानीय जनप्रतिनिधि र प्रशासनलाई समेत खोजीका लागि अनुरोध गरिएको डाक्टर गिरीले बताए । परीक्षणमा पोजेटिभ देखिएका व्यक्ति नै सम्पर्कमा नआउँदा उनीहरुको ट्राभल हिस्ट्री र उनीहरुको कारण समाजमा अझै जोखिम बढ्ने देखिएको उनले बताए ।

उनीहरु भारतबाट आएका र पुनः भारत जानका लागि पिसिआर परीक्षण गराउन अस्पताल पुगेका थिए । उनीहरुले निर्धारित शुल्क भुक्तानी गरेर पिसिआर परीक्षण गराएका थिए । नतीजा पोजेटिभ आएको भन्ने पहिलो कल रिसिभ गरेपनि त्यसलगत्तै उनीहरुले मोबाइल सम्पर्क नहुने बनाएका थिए । सुरक्षा स्रोतका अनुसार उनिहरुको मोवाइल नम्बरका आधारमा खोजी गर्दा रुपन्देहीमा उनिहरुको लोकेशन रुपन्देहीमा देखिएको छैन ।

Advertisement