थप २१० जनामा कोरोना संक्रमण, १४६ संक्रमित डिस्चार्ज

बुटवल । नेपालमा बुधबार थप २१० जनामा कोरोना संक्रमण भएको छ । स्वास्थ्य मन्त्रालयको नियमित प्रेस ब्रिफिङका क्रममा मन्त्रालयका प्रवक्ता डा.जागेश्वर गौतमले पछिल्लो २४ घण्टामा देशभर गरी २१० जनामा कोरोना संक्रमण भएको बताएका हुन् । ६ हजार ३७ जनामा गरिएको पिरिआर परिक्षणमा २१० जनामा कोरोना संक्रमण पुष्टि भएको हो ।

योसँगै संक्रमितको कूल संख्या १९ हजार २७३ पुगेको छ । हाल देशभर गरी ५ हजार १३९ जना सक्रिय संक्रमित रहेका छन् । पछिल्लो २४ घण्टामा देशभर गरी थप १४६ जना कोरोना संक्रमित डिस्चार्ज भएका छन् । योसँगै कोरोना भाइरस संक्रमणमुक्त हुनेको कूल संख्या १४ हजार २१ पुगेको छ । संक्रमित मध्ये ७२.७ प्रतिशत निको भएको स्वास्थ्य मन्त्रालयले जनाएको छ ।

देशभर गरी ५ हजार ३ सय ६० सक्रिय कोरोना संक्रमित रहेका छन् । हालसम्म ३ लाख ५७ हजार ३४४ जनाको पिसिआर विधिबाट कोरोनाको परिक्षण गरिएको स्वास्थ्य मन्त्रालयले जनाएको छ । कोरोनाबाट नेपालमा ४९ जनाको मृत्यु भएको छ ।