बुटवल उपमहानगरले घरबहाल छुट नदिएको गुनासो, सम्झौता अवधि थप्न माग

बुटवल । बुटवल उपमहानगरपालिका अन्तरगत सञ्चालनमा रहेका ब्यवसायीक सडटरका ब्यवसायीहरुले लकडाउन अवधिभरको भाडा छुट गर्न माग गरेका छन् । उपमहानगरले विश्वव्यापी कोरोना महामारीसँगै लकडाउन अवधिमा १ महिनाको भाडा मात्रै छुट गरेर व्यवसायीहरुलाई टार्ने काम गरेको उनिहरुको आरोप छ । निजि क्षेत्रहरुबाट समेत सतप्रतिशत घरबहाल मिनाहा तथा भारी छुट प्रदान भैरहेको समयमा बुटवल उपमहानगर न्यूनतम छुट दिएर उम्किने प्रयास भएको उनिहरुले बताए ।

बुटवल-५ स्थित हाटबजार र अमरपथमा रहेको उपमहानगरको ब्यबसायिक भवनमा सञ्चालनमा रहेका ४० जना ब्यापारीहरुले पत्रकार सम्मेलन गरि लकडाउनका कारण ब्यवसाय धरासायी भएको गुनासो गर्दै घरभाडा मिनाहाको माग राखेका हुन् । उपमहानगरले लकडाउन अवधिको भाडा छुट गर्नुको साटो यथासिघ्र भाडा बुझाउन भन्दै ताकेता गरेको उनिहरुले बताए । लकडाउन अवधीको भाडा शतप्रतिशत मिनाहा गर्ने, लकडाउनका कारण धरासायी भएको ब्यबसायलाई उकास्न भाडा समायोजन गर्ने र सम्झौता अवधी कम्तिमा ३ बर्ष थप गर्ने माग गर्दै नगरपालीकामा निवेदन बुझाएको भएपनि सोको पुरै बेवास्ता गर्दै ब्यबसायीहरुसँग छलफल नै नगरि आफुखुशी निर्णय गरिएको भन्दै ब्यबसायीहरुले आपत्ती प्रकट गरे ।

असार मसान्तमा सम्झौता अवधी सकिएका करिब ४० व्यवसायीले नगर सरकारको मातहतमा रहेपनि लकडाउन अवधिमा १ महिनाको मात्रै भाडा छुट गर्नु र १ बर्ष मात्र सम्झौता थप्नु अभिभावकिय काम नभएको भन्दै लकडाउनको अवधिमा पसल बन्द भई समस्यामा परेका व्यवसायीलाई राहात दिन समेत उनिहरुले माग गरे ।

पत्रकार सम्मेलनमा बोल्दै व्यवसायी भरत श्रेष्ठले उपमहानगरपालिकासँग सम्झौता गर्दा बहाल भाडा सस्तो भएपनि अहिले ब्यवसायि धरासायि बन्न बाध्य भएकोले भाडा समायोजन गर्नुपर्ने आवश्यक्ता रहेको बताए । नगरपालिकाले व्यवसाय सञ्चालन गर्नको लागि स्वीकृति दिएको १०–१५ दिनबाट नै बहाल उठाउन ताकेता गरिएकोले ब्यबसायीहरुमा झन तनाव उत्पन्न भएको उनले बताए । उनले भने-‘व्यक्तिगत निजि घर वा भवनमा बसेकोले पनि ३ महिनाको बहाल छुट गरेका छन्, नगरपालिकाले भने उल्टो बहाल तिर्न ताकेता गर्यो, जस्ले हामीलाई निकै समस्या परेको छ ।

अर्का व्यवसायी गँगाराम भुसालले आफुहरुका माग सम्बोधन गर्ने भनेर उपमहानगरपालिकाले बिगतमा आश्वासन दिएपनि कार्यान्वयनमा भने प्रभावकारी नभएको बताए । उनले अहिले थप १ वर्षको लागि सम्झौता गर्नको लागि बोलाईएपनि आफुहरुसँग बहाल तिर्ने र सम्झौतावापत दिनुपर्ने रकम नभएकोले जान नसकेको बताए । यस्तै अन्य व्यवसायीहरु पद्मनारायण मानन्धर, बिष्णुप्रसाद श्रेष्ठ, सञ्जय बज्राचार्य, मिना मानन्धर लगायतले बुटवल नगरपालिकासंगको समन्वयमा व्यवसायीलाई केही राहत उलब्ध गराउन भएपनि आफुहरुका माग सम्बोधन हुनुपर्ने तर्क गरे ।