सोलारको असफलता पछि विद्युतीय बत्तीले तिलोत्तमाको सडक झिलिमिली

बुटवल । सिद्धार्थ राजमार्ग अन्तर्गत पर्ने रुपन्देहीको तिलोत्तमा नगर भित्रका सडक सफा र हरियाली मात्र होइन झिलिमिलि पनि हुन थालेको छ । नगर भित्रको ६ लेन सडकमा व्यवस्थित बिजुली बत्तीको व्यवस्था भएपछि रातको समयका थप मनमोहक दृश्यसहित यात्रुहरुको मनै लोभ्याउन सडकका रुपमा परिणत भएको छ । सडक बिचमा रहेको डिभाइडरमा हरियाली भरेर चिटिक्क परेका छन् । सडकको दुबै छेउमा रूख रोपेर हरियाली र मनमोहक बनाईएको छ ।

सौर्य ऊर्जा (सोलार) प्रभावकारी नभएपछि तिलोत्तमा नगरपालिकाको ड्राइभरटोल देखि कोटिहवासम्मको सडकखण्डमा बत्ती जडान गरिएको नगर प्रमुख वासुदेव घिमिरेले बताए । दुई वर्षअघि १० वर्षका लागि सम्झौता गरेर दुई करोड रुपैयाँ लगानी गरेर जडान गरिएका सोलार बत्ती बल्न छाडेपछि नगरपालिकाले सडक बत्ती जडानको काम अगाडि बढाएको उनले बताए । ‘नगरलाई उज्यालो बनाउन हामिले सोलार बत्ती जडान गर्यौ, त्यो त्यती प्रभावकारी भएन’, नगरप्रमुख घिमिरेले ग्लोबल आवाजसँग भने, ‘उज्यालो तिलोत्तमा अभियान अन्तर्गत विद्युतीय सडक बत्ती जडान गरि नगरलाई उज्यालो बनाउने अभियानमा लागिपरेका छौं ।’

नगरप्रमुख घिमिरले रातिमा यात्रा गर्दा यस सडक खण्डमा धेरै दुर्घटना निम्तिएको बताउँदै सडक बत्तीले दुर्घटना न्यून हुने विश्वास लिएको बताए । उनले हिँडडुल गर्नलाई असुरक्षित हुने गरेकाले नगरवासी र पर्यटकलाई ध्यान दिई सडक बत्ती जडान गरी सञ्चालनमा ल्याएको जिकिर गरे । सडक बत्तीका कारण अब रातीको समयमा झलमल्ल उज्यालोमा हिँडडुल गर्न सकिने छ । पहिलो चरणमा ड्राइभरटोलदेखि कोटिहवासम्म बत्ती जडान गरिएको र दोस्रो चरणमा योेगीकुटीदेखि ड्राइभर टोलसम्म र कोटिहवा दक्षिणको बाँकी भागमा पनि विद्युतीय सडक बत्तीको जडान हुने घिमिरेले जानकारी दिए ।

बुटवल–बेलहिया सडक आयोजनाका अनुसार तिलोत्तमा नगरभित्र १४ किलोमिटर दूरीमा बत्ती जडान गरिएको छ । सडकको बीचमा रहेका डिभाइडरमा ३०-३० मिटरको फरकमा पोल गाडिएका पोलका दायाँ–बायाँ १ सय ५० वाटका दुई बल्ब जडान गरिएका छन् । सर्भिस लेनमा ४० वाटका बल्ब राखिएका छन् । काठमाडौंको नरेन्द्र पीएसएस जेभीले ठेक्का लिएको छ ।

डिभाइडरमा बल्ने बत्तीको महसुल नगरपालिकाले र सर्भिस लेनमा बल्ने बत्तीको महसुल सम्बन्धित टोल विकास संस्थाले बेहोर्ने नगर प्रवक्ता सुरेन्द्र श्रीले बताए । २ वर्षसम्म सडक बत्तीको मर्मत–सम्भारको जिम्मेवारी ठेकेदार कम्पनीले लिएको नगरपालिकाले जनाएको छ ।