अवरुद्ध बुटवल-पाल्पा सडक करिब ४४ घण्टापछि खुल्यो

बुटवल । सोमबार साँझदेखि पहिरोले अवरुद्ध सिद्धार्थ राजर्माग अन्तर्गत बुटवल-पाल्पा खडकखण्ड करिब ४४ घण्टापछि सुचारु भएको छ । तिनाउ-३, दोभान प्रहरी चेकपोष्ट देखि करिब सय मिटर बुटवलतर्फ सुख्खा पहिरोले सडक पुरिएर अवरुद्ध भएको थियो । बाटो सञ्चालमा आएसँगै पाल्पातर्फ रोकिएका ३ सय बढी सवारी साधन तथा बुटवलतर्फका सवारी साधनहरु गन्तव्यमा लागेका छन् ।

Advertisement

सुख्खा पहिरोसँगै करिव ३० मिटर लामो २० मिटर चौडा तथा १० मिटर लामो ५ मिटर चौडा दुई ठूला चट्यानले बाटो पुरिएपछि अवरुद्ध सडक खुलाउन लामो समय लागेको हो । ग्लोबल आवाजसँगको कुराकानीमा वर्षासँगै पहिरो माथीबाट ढुङ्गा तथा माटो झर्ने क्रम नरोकिँदा रातको समयमा पहिरो सफाइ गर्न नसक्दा सडक सुचारु गर्न ढिलाई भएको ट्राफक प्रहरी कार्याले बुटवलले बतायो । डिभिजन सडक कार्यालय बुटवलको दुई वटा एक्स्काभेटर तथा एक जेसिबी र पाल्पा सडक डिभिजन कार्यालयको डोजरले बाटो सफाई गरेपछि सडक पुर्ण रुपमा सुचारु भएको प्रदेश ५ ट्राफिक प्रहरी कार्यलले जनाएको छ ।

सोमबार साँझ करिब ५ बजे झरेको सुख्खा पहिरोले करिब ५० मिटर सडक पुरेको थियो । सोमबार साझ सडक डिजिन कार्यालय पाल्पाको डोजरले बाटो खुलाउने प्रयास गरेपनि असम्भव भएपछि भोलिपल्ट सडक डिभिजन कार्यालय बुटवलबाट गएको थप एक जेसीबी र एक्स्काभेटरले दिनभरको प्रयासपछि पनि सडक खुलाउन सकेका थिएनन् । पहिरोसँगै झरेका ठूला चट्यान हटाउन एक मात्र एक्स्काभेटरले सम्भव नहुँने तथा अन्य उपकरणको समेत कमी भएपछि बुधबार उपकरण थप गरिएको थियो ।

बुधबार विहान करिव १० बजे नै सडक एकतर्फी खुले पनि पूर्ण रुपमा पहिरो सफा गरेर मात्रै मध्यान्नपछि सडक सुचारु गरिएको हो । मध्यान्न १२ बजे नै पहिरो सफा गरी सुचारु हुनै लागेको सडक माथीबाट झरेको गग्ग्रेटोले पुन बाटो अवरुद्ध हुँदा थप एक घण्टा लागेको थियो ।