दाङमा सलह धपाउने यन्त्र

तुलसीपुर । दाङमा पहिलो पटक बाली विनाशक वन्यजन्तु र सलह किरा धपाउने यन्त्र भित्र्याइएको छ । भौतिक क्षति बिनानै सहज रुपमा बालीनाली नोक्सान गर्ने वन्यजन्तु र सलह किरा धपाउन प्रभावकारी मानिएको सो यन्त्र दाङ, घोराही १४ का स्थानीय युवा नरेन्द्र पुनको सक्रियतामा जिल्लामा भित्र्याइएको हो ।

Advertisement

वालिङ नगरपालिका, स्याङ्ग्जाका भविश्वर कोइरालाले महाबीर पुनको सहयोगमा निर्माण गरेका सो यन्त्र परिक्षणका लागि पठाईदिएकोमा आज सोमबार परिक्षण पनि गरिएको छ । बाँदर, बँदेल धपाउन प्रभावकारी मानिएको र पछिल्लो समय दाङमा सलह किराले मकै तथा तरकारी बालीमा क्षति कम गर्न सो यन्त्रको सहयोगमा बाली जोगाउन सकिने भन्दै जिल्लामा ल्याइएको पुनको भनाइ छ । हिजो आईतबार दिउँसो एकै पटक ठूलो झुण्डमा आएको सलहले दाङको राप्ती गाउँपालिका वडा नम्बर २, ३, ४ तथा गढवा गाउँपालिकाको वडा नम्बर २ र ३ नम्बर वडामा क्षेत्रमा लगाईएको मकै तथा अरु बालीमा क्षति पुर्याएको सूचना पाएपछि आज सोमबार बिहानै सो क्षेत्रमा पुगेको टोलीले सलह त्यहाँबाट उडेर गई सकेकाले सो यन्त्रको प्रयोग गर्न पाएन ।

तर, सो यन्त्र यसअघि अरु ठाउँमा प्रयोगमा ल्याई सकिएको र प्रभावकारी भएको मानिएको छ । जिल्लामा भित्र्याईएको यो यन्त्रको प्रयोगबाट बालीनाली जोगाउन सहयोग पुग्ने हुँदा सलहको झुण्ड आएमा वा बाँदर, बँदेलले अन्नबालीमा क्षति पुर्याएमा जो कोहीले जानकारी गराए सहयोग गरिने युवा समाजसेवी पुनले बताएका छन् । जिल्लामा ल्याईएको सो यन्त्रले सलहलगायत अरु वन्य जन्तुलाई बालीनाली क्षति हुनबाट जोगाउन प्रभावकारी भएमा त्यस्ता अरु यन्त्र निर्माण गरी सहयोग गर्न आविष्कारक महाबीर पुन ईच्छुक रहेको समाजसेवी पुनले बताए ।

सामान्य प्लाष्टिक तथा पोलिमर पाइपको प्रयोग गरी बनाइएको उक्त यन्त्र कम खर्चमा निर्माण गर्न सकिने हुँदा प्रभावकारी बनेको बताइएको छ । सो यन्त्र पडकाउँदा भने विशेष सावधानी अपनाउनु पर्ने अर्का सुमन अधिकारीले बताए । बाँदर धपाउने नाम दिइएको सो यन्त्रमा केही रसायन राखेर पड्काइने हुँदा सावधानी अपनाउनु पर्ने उनको भनाइ छ ।