लालपूर्जा वितरणका लागि गढवामा जग्गा नापजाँचको काम सुरु

दाङ । भूमिहिन तथा सुकुम्वासीलाई लालपूर्जा वितरणका लागि गढवा गाउँपालिकामा जग्गा नापजाँचको काम सुरु भएको छ । गढवा गाउँपालिका–३ को खैरा गाँउबाट भूमिहिन, सुकुम्बासी, दलित तथा अब्यवस्थित बसोबासीहरूले जोतभोग गरिरहेको जग्गा नापजाँचको कार्य सुरु भएको हो ।

गढवा गाउँपालिकाको वडा नं। १ र २ मा जग्गा नाप जाँचको काम सकिएपछि विहीवारदेखि वडा नं ३ मा नापजाँचको काम सुरु भएको गढवा गाउँपालिका भूमि शाखा प्रमुख सञ्जित पौडेलले जानकारी दिए । जग्गा नापजाँचको काम सुरु भएपछि वर्षौदेखि लालपूर्जा बिहिन नागरिकलाई लालपूर्जा प्राप्त हुने आशा पलाएको छ ।

गढवा गाउँपालिकामा वडा नं १ मा १ हजार ५ सय ७ घरधुरीको नापजाँच गरिएको उनले जानकारी दिए । उनका अनुसार जसमा अव्यवस्थित १ हजार १ सय ५, भूमिहिन दलित ९५, भूमिहिन सुकुम्बासी ३ सय ७ गरी जम्मा २ हजार पाँच सय ५९ कित्ता नापजाँच गरिएको छ । जस्मा २ सय ७९ हेक्टर जग्गा रहेको छ ।

त्यसैगरी वडा नं २ मा १ हजार ८ घरधुरीको जग्गा नापजाँच भएको छ । जसमा १ सय ६५ हेक्टर जमिनको २ हजार ७ सय ९६ कित्ताको नापजाँच गरिएको छ । जसमा अव्यवस्थित बसोवासी ९ सय ३८ जना, भूमिहिन दलित १९ जना, भूमिहिन सुकुम्बासी ५१ जना गरी जम्मा २ हजार ७ सय ९६ जना रहनुभएको पौडलले जानकारी दिए ।

गढवा गाउँपालिकामा यस आर्थिक वर्षभित्र वडा १ देखि ८ सम्मका सवै वडामा जग्गाको नापजाँचको काम सक्ने गरि काम भइरहेको गढवा गाउँपालिकाका अध्यक्ष यमनारायण शर्मा पोख्रेलले जानकारी दिए ।

‘गढवा गाउँपालिकामा यसआर्थिक वर्षमा सबै वडामा जग्गाको नापजाँच गर्ने र अर्को वर्ष जग्गा वितरण गर्नेगरी जग्गाको नापजाँचको काम भइरहेको छ’, गाउँपालिका अध्यक्ष पोख्रेलले भने, ‘जसअनुसार अहिलेसम्म दुई वटा वडाहरुमा नापजाँचको काम सकिएको छ भने ३ नम्वर वडामा काम सुरु भएको छ ।’