अर्घाखाँची भूमिकास्थान-रुपन्देही सम्पर्क मञ्च गठन

पुस २७,

ग्लोबल आवाज

बुटवल । अर्घाखाँचीको भूमिकास्थान नगरपालिकाबाट रुपन्देहीमा आई स्थायी तथा अस्थायी रुपमा बसोबास गर्ने नेपाल कम्युनिष्ट पार्टी (नेकपा) निकटहरु संगठित भएका छन् । बुटवलमा सम्पन्न प्रारम्भिक भेलाले अर्घाखाँची भूमिकास्थान रुपन्देही सम्पर्क मञ्च गठन गरेको हो ।

कार्यक्रममा बोल्दै नेकपाका स्थायी समिति सदस्य टोपबहादुर रायमाझीले परिवर्तित सन्दर्भमा सामाजिक रुपान्तरणका लागि पाटीप्रति क्रियाशील हुनुपर्ने बताए । संघीय सांसद रायमाझीले भूमिकास्थान नगरपालिकामा निर्माणको क्रममा रहेका तथा प्रस्तावित विकास आयोजनाको बारेमा जानकारी गराउका थिए । प्रदेश सांसद तथा नेकपा प्रदेश कमिटी सचिवालय सदस्य चेतनारायण आचार्यले भूमिकास्थानको विकास तथा त्यहाँका बासिन्दाको समृद्धिका लागि समेत मञ्च क्रियाशील हुनुपर्नेमा जोड दिए । भूमिकास्थान नगरपालिकाका प्रमुख रेशम थापाले पार्टीगत रुपमा रुपन्देहीमा आएकाहरु संगठित हुनु राम्रो भएको बताउँदै नगरको विकासमा सुझाव दिन आग्रह गरे । भूमिकास्थानको विकासका लागि जनप्रतिनिधिहरु प्रतिबद्ध भएर लागेको उल्लेख गर्दै उनले यसमा सबैको साथ–सहयोग अपरिहार्य रहेको बताए ।

भेलामा पार्टीका केन्द्रीय सदस्य तथा अर्घाखाँची ईञ्चार्ज नजिर मिया, केन्द्रीय सदस्यहरु गिरीधारीलाल न्यौपाने, दधिराम न्यौपाने, नेताहरु तेजबहादुर रायमाझी (विधान), रामप्रसाद बञ्जाडे, जालपा भुसाल, खगेश्वर पन्थी, राजेन्द्र आचार्य, नारायणप्रसाद बञ्जाडे लगायतले मन्तव्य राखेका थिए । भेलाले अर्जुन गैरे अध्यक्ष तथा यमप्रसाद गैरे सचिव रहेको ४५ सदस्यीय कार्यसमिति चयन गरेको छ ।

अर्जुन गैरेको अध्यक्षतामा भएको भेलाको सञ्चालन यमप्रसाद गैरेले गरेका थिए ।