जरोकिलो पार्टीको प्रदेश भेला: प्रदेश ५ अध्यक्षमा रेशम बुढा

पुस २७,

Advertisement

ग्लोबल आवाज

बुटवल । मौलिक जरोकिलो पार्टी प्रदेश ५ को प्रदेश भेला तथा पृथ्वीनारायण शाहीको २९८ औं पृथ्वी जयन्ती एकसाथ बुटवलमा सम्पन्न भएको छ ।

कार्यक्रममा बोल्दै पार्टीका केन्द्रिय सदस्य नुमनाथ प्याकुरेलले देशका अन्य पार्टीहरू विदेशी नीति, सिद्धान्त भएको र नेपाली भुगोल, वातावरण, धर्म, संस्कृति, रितिरिवाज र चलन अनुसार मौलिक जरोकिलो पार्टीको सिद्धान्त प्रतिपादन भएको दाबी गर्दै अब आउने दिनमा विज्ञानको बुद्धि, प्रविधिको प्रगति, धर्मको विवेक र सहृदयताको सम्बन्ध अनुुसार पार्टीले आम नेपाली नागरिकहरूको भावनालाई सम्बोधन गर्दै जाने बताए । अर्का केन्द्रिय सदस्य यमनाथ उपाध्यायले नेपालको तनहुँ जिल्लाबासी युगद्रष्टा डा.निर्मलमणि अधिकारी उपाध्यायद्धारा प्रतिपादित ‘राज्यराष्ट्र’ सिद्धान्त र पार्टीको निति र अनुसन्धान बारेमा भनाई राखे ।

भेलाले मित्रलाल शर्माको संयोजकत्व भएको समितिलाई विघटन गर्दै केन्द्रीय सदस्य नुमनाथ प्याकुरेलको संयोजकमा केन्द्रीय सदस्य यमनाथ उपाध्याय र मित्रलाल शर्माको तीन सदस्यीय निर्वाचन समितिले सर्वसम्मत निर्वाचित नयाँ कार्यसमितिको घोषणा गरेका छ । जसमा प्रदेश नम्बर ५ को अध्यक्ष रेशम प्रसाद बुढा, उपाध्यक्ष रामचन्द्र खड्का रहने गरि ९ सदस्यीय कार्यसमितिको घोषणा गरिएको छ । यसैगरी अन्य सदस्यहरू थप गर्दै जानेगरी निर्णय पारित गरिएको छ ।

यसै क्रममा नयाँ कार्य समितिको सपथ ग्रहणसंगै अध्यक्ष रेशम बुढाले मन्तव्यमा पार्टीलाई अगाडि बढाउँदै लैजाने क्रममा पृथ्वी नारायण शाहको योगदानलाई अहिलेको सरकारले भुले पनि नेपाली नागरिकले नभुल्ने र आफुहरू सधैं उनको पथलाई पछ्याई रहने बताए । कार्यक्रम मित्रलाल शर्माको सभापतित्व, रामचन्द्र खड्काको स्वागत र यमनाथ उपाध्यायको संचालनमा भएको थियोे ।