राष्ट्रिय एकता र पर्यटन प्रवर्द्धन गर्न म्याराथुन

पुस २६,

ग्लोबल आवाज

बुटवल । राष्ट्रिय एकता र पर्यटन प्रवर्द्धन गर्ने उद्देश्यका साथ नेपाली सेनाको आयोजनामा शनिबार बुटवलमा खुल्ला जीतगढी म्याराथुन प्रतियोगिता सम्पन्न भएको छ । कुल ४२, २१, १० र ५ किमि लामो ४ चरणमा आयोजना गरिएको सो म्याराथुनको उपप्रधानमन्त्री तथा रक्षा मन्त्री ईश्वर पोखरेलले शुभारम्भ गरका थिए । करिब ४ हजार जनाको सहभागिता रहेको सो प्रतियोगितामा बिजयीहरुलाई पुरस्कार वितरण गर्दै उपप्रधानमन्त्री तथा रक्षा मन्त्री ईश्वर पोखरेलले राष्ट्रिय एकता र पर्यटन प्रवर्द्धन गर्न सबै एकजुट हुनुपर्ने धारणा व्यक्त गरे । ऐतिहासिक एवं राष्ट्रिय गौरवका सम्पदाहरुको संरक्षण प्रवर्द्धन र बिकास गर्दै समृद्धिको दिशामा अघि बढ्न प्रेरणा मिलेको उद्घोष गर्दै रक्षा मन्त्री ईश्वर पोखरेलले दलगत राजनिति भन्दा माथि उठेर राष्ट्रिय एकताको भावनामा समाहित हुन सबैलाई आग्रह गरेका छन् ।

४२ किमि लामो फुल म्याराथुन प्रतियोगितामा प्रथम हुनेले नगद १ लाख, द्धितियले ५० हजार र तृतिय हुनेले २५ हजार पुरस्कार प्राप्त गरेका छन । यस्तैगरि २१ किमि हाफ म्याराथुनमा प्रथम हुनेले नगद ५० हजार, द्धितियले २५ हजार र तृतियले १५ हजार पुरस्कार प्राप्त गरेका छन । साथै १० किमि म्याराथुनमा प्रथम, द्धितिय र तृतिय हुनेले क्रमशः नगद १५, १० र ५ हजार पुरस्कार प्राप्त गरेका थिए । सो अवसरमा पृतनापति सिताराम खड्काले नेपाल र नेपाली सेनाको ईतिहास प्रवद्र्धन गर्न, नेपाली सेनाले अंग्रेजी फौजमाथी विजय प्राप्त गरेको जीतगढी किल्लाको ऐतिहासिक महत्वलाई उजागर गर्न र त्यसको प्रचार प्रसार एवं संरक्षणकालागि जीतगढी म्याराथुन प्रतियोगिता आयोजना गरिएको बताए ।

उपप्रधानमन्त्री तथा रक्षा मन्त्री पोखरेलले अन्य सहभागिसँगै चौथो चरणको ५ किमि लामो म्याराथुन प्रतियोगितामा सहभागि भइ दौड पुरा गरेका थिए । प्रतियोगितामा प्रदेश ५ का मुख्यमन्त्री शंकर पोखरेल, आन्तरिक मामिला तथा कानुन मन्त्री कुलप्रसाद केसी, पर्यटन मन्त्री लिला गिरी, नेपाली सेना मध्यपश्चिम पृतनाका पृतनापति सिताराम खड्का लगाएतको सहभागिता रहेको थियो । राष्ट्रिय एकता दिवसको अवसर पारेर नेपाली सेनाको मध्यपश्चिम पृतना बुटवलले ऐतिहासिक जीतगढी किल्लाको प्रवर्द्धन र नेपाल भ्रमण वर्ष २०२० लाई लक्षित गरेर खुल्ला म्याराथुन प्रतियोगिता आयोजना गरेको होे ।