बिपद न्यूनिकरण गर्न विद्यालय स्तरीय कार्यक्रम

पुस २५,

ग्लोबल आवाज

गुल्मी । भूकम्पपछि निर्माण गरिने भवनहरुमा जोखिम न्यूनिकरण गर्ने उद्देश्यले गुल्मीमा विद्यालय स्तरीय कार्यक्रम गरिएको छ । जिल्ला सदरमुकाम तम्घासमा विद्यालयमा आधारित बिपद जोखिम न्यूनिकरण सम्बन्धी कार्यक्रम गरिएको हो । राष्ट्रिय पूनर्निर्माण प्राधिकरण जिल्ला आयोजना कार्यन्वयन ईकाइ शिक्षाको आयोजनामा जिल्ला भर रहेका मध्ये ४३ वटा विद्यालयका प्रधानाध्यापकहरुको सहभागितामा बिपद जोखिम न्यूनिकरण सम्बन्धी कार्यक्रम राखिएको थियो ।

निर्माण भइरहेका कक्षा कोठाहरु भवनहरु सुरक्षित, बलियो बनाउने उद्देश्य कार्यक्रम गरिएको राष्ट्रिय पूनर्निर्माण प्राधिकरण जिल्ला आयोजना कार्यन्वयन ईकाइ शिक्षा गुल्मीका प्रमुख पिताम्बर पन्थीले बताए । पूनर्निर्माण भइरहेका भवनहरु र अबका दिनमा निर्माण हुने विद्यालयका भौतिक संरचनाहरु आफैले निर्माण गरेका आफ्नो लागि घातक नहोउन भन्ने उदेश्यले कार्यक्रम गरिएको प्रमुख पन्थीले बताए । जिल्ला भरबाट आएका बिभिन्न विद्यालयका प्रधानाध्यापकहरुलाई बिपद न्यूनिकरण र नेपालको अबस्थाको बारेमा शसस्त्र प्रहरी वल गुल्म गुल्मीका प्रहरी नायव उपरिक्षक बिनोदराज खनाल, जिल्ला आयोजना कार्यन्वयन इकाइ शिक्षा गुल्मीका इन्जिनियर लक्ष्मण राउतले जानकारी गराएका थिए ।

अब बन्ने संरचनाहरु बिपदमैत्री बनाउने बारे प्रशिक्षण राखिएको थियो । सानो कुरामा ध्यान दिन सके विपदबाट जोगिन सकिने जिल्ला समन्वय समिति गुल्मीका प्रमुख लक्ष्मण पराजुलीले बताए । धेरै जसो बिपद हामीले बनाएका संरचनाबाट हुने गरेको पराजुलीको भनाई छ । प्राकृतिक बिपदले भन्दा पनि हामीले निर्माण गरेका संरचनाबाट ठूलो जनधनको क्षती हुने गरेकाले बिपदलाई न्यूनिकरण गर्न संरचना निर्माणमा ध्यान दिनुपर्ने प्रमुख पराजुलीले बताए । भुकम्प पछि धेरै जसो निर्माण भएका भवनहरुमा केहि परिर्वतन आएको छ ।

तर बिपदको बेला केहि समय सम्झीने गरेपनि केहि समयपछि भुल्ने बानीले पनि बिपद न्यूनिकरणमा ध्यान नगएको गुल्मीका प्रमुख जिल्ला अधिकारी कोशहरि निरौलाले बताए । सामान्य कुराले पनि बिपद न्यूनिकरण गर्न सकिने प्रमुख जिल्ला अधिकारी निरौलाको भनाई छ ।