१६ मंसिर २०७९, शुक्रबार

Dec 2, 2022

बुटवल । मंसिर–४ मा सम्पन्न प्रदेश तथा प्रतिनिधिसभा निर्वाचमा देखिएको अप्रत्यासित नतिजाले ठूला तथा पुराना दलहरुलाई सोच्न बाध्य बनाएको छ । गत वैशाख–३० मा सम्पन्न स्थानीय तह निर्वाचनमा बालेन शाह, हर्क साम्पाङ लगायको विजयी यात्रासँगै हौसिएको नयाँ पुस्ताले यस पटकको निर्वाचनबाट केही नयाँ अनुहारलाई संसद प्रवेश गराउने भएको छ । सामाजिक सञ्जाल तथा सञ्चार माध्यमहरुमा नेता कम सेलिब्रेटी बढी जस्तो देखिने युवा पुस्ताहरुले संसदमा के–कस्तो भूमिका निभाउन सक्ने छन् त्यो भने हेर्न बाँकी नै छन् ।

Advertisement

संसदीय राजनीतिमा आएका केही नयाँ अनुहारका बारेमा यहाँ चर्चा गरेका छौं ।

ज्ञानेन्द्र शाही : पछिल्लो केही वर्षयता सामाजिक अभियान्ता तथा आफूलाई भ्रष्टाचार विरोधी आन्दोलनको नेताको रुपमा चर्चा कमाएका ज्ञानेन्द्रसाही मंसिर–४ को प्रतिनिधिसभा निर्वाचनबाट संसद प्रवेश गर्दै छन् । जुम्लाबाट चुनाव लडेका उनले आफूलाई कुनै राजनीतिक दलको व्यक्तिको रुपमा नरहेको दाबी गरे पनि अन्तिममा राष्ट्रिय प्रजातन्त्र पार्टी राप्रपामा प्रवेश गरी प्रतिनिधिसभा निर्वाचनका लागि उम्मेदवार बनेका थिए । सम्पन्न निर्वाचनबाट भारी मतकासाथ उनको संसदयात्रा पक्का भएको छ । उनले २२ हजार ८१९ मतसहित विजयी हुँदा उनका निकटतम प्रतिस्पर्धी नेकपा माओवादी केन्द्रका गोमा गौतम (कुँवर)ले ११ हजार ९५९ मत प्राप्त गरेकी छन् । यसरी शाहीले १० हजार ८६० को मतान्तरले विजयी भएका हुन् । कडा र खरो रुपमा भ्रष्टाचारका विरुद्ध बोल्ने शाहीले आफै नीति निर्माण र कार्यान्वयन गर्नसक्ने थलो संसदमा पुगेपछि के गर्नेछन् हेर्न बाँकी नै छ ।

रबी लामिछाने : लामो समय अमेरिका बसाई पछि नेपाल फर्केर सञ्चार क्षेत्रमा छाएका रवि लामिछाने पहिलो पटक संसद छिर्ने तयारीमा छन् । टेलिभिजन प्रस्तोताका रुपमा सबैभन्दा बढी समय ‘लाईभ सो’ चलाएर गिनिज बुक अफ वल्र्ड रेकर्डमा नाम लेखाउन सफल लामिछाने सेलिबे्रटी सञ्चारकर्मीका रुपमा चिनिन्छन् । नेपाली नागरिकता त्यागेर अमेरिकी नागरिकता लई बसेका उनी पुनः नेपाल फर्केर सञ्चार क्षेत्रमा लागेका हुन् । यद्यपी उनको नागरिकताको विषयमा निर्वाचनमा आयोगमा समेत उजुरी परेको छ । उक्त उजुरी बारे अदालतले दिने अन्तिम फैसलाले नै उनको संसद यात्रा बारे टुङ्गो लगाउने छ ।

राष्ट्रिय स्वतन्त्र पार्टी गठन गरी चुनावी प्रतिस्पर्धामा होमीएका उनको पार्टीले देशका मुख्य शहरहरुमा सकारात्मक नतिजाहरु निकालेको छ । लामिछानेले चितवन-२ बाट प्रतिनिधिसभा सदस्यका लागि उम्मेदवारी दिएका थिए । जारी मतगणनामा उनको जित निश्चित प्राय भएको छ । उनले चितवनबाट उम्मेदवारी दिनेभएपछि नेकपा माओवादी केन्द्रका अध्यक्ष पुष्पकमल दाहाल प्रचण्डले चितवन छाडेर गोर्खा जानुपरेको थियो । गोरखाबाट प्रचण्ड विजयी भैसकेका छन् । जारी मतगणनामा ४५ हजार ९३४ मत प्राप्त गर्दा उनका निकटतम प्रतिस्पर्धी नेपाली काँग्रेसका उमेश श्रेष्ठको मत मात्र १४ हजार ४०६ रहेको छ । यसरी भारी मतान्तरसहित अघि बढेका लामिछानेको जित निश्चित जस्तै भएको छ ।

राष्ट्रिय स्वतन्त्र पार्टीका अध्यक्ष लामिछानेले टेलिभिजन प्रस्तोताका रुपमा मुलुकको अवस्थाका बारेमा खरो रुपमा आलोचना गर्ने गरेका थिए । कडा प्रस्तुती र सेलिब्रेटी शैलीकै कारण नयाँ पुस्ताले उनको पार्टीलाई यस पटक उत्साहजनक रुपमा समर्थन गरेको देखियो । अबको संसद यात्रामा छामिछानेको प्रस्तुती कस्तो रहने छ त्यो भने हेर्न बाँकी नै छ ।

डा.तोसिमा कार्की : एक टेलिभिजन कार्यक्रममा प्रधानमन्त्री शेरबहादुर देउवालाई कडा प्रश्न गरेको उनको भिडियो सामाजिक सञ्जालमा भाइरल छ । विद्यार्थीकालमा केही वर्ष अगाडी नेपालको चिकित्सा क्षेत्रको बारेमा प्रधानमन्त्री देउवालाई कडा प्रश्न गरेकी कार्की यस पटकको निर्वाचनबाट आफैले नीति बनाउने र कार्यान्वय गर्ने थलो संसदमा प्रवेश गरेकी छन् । रवि लामिछाने नेतृत्वको राष्ट्रिय स्वतन्त्र पार्टीको घण्टी चिन्ह लिएर ललितपुर क्षेत्र नम्बर–३ बाट भारी मतका साथ उनी निर्वाचित भएकी हुन् । तोसिमाले ३१ हजार १३६ मत प्राप्त गर्दा उनका निकटतम प्रतिस्पर्धी नेकपा एमालेका अमृता खड्काले मात्र १२ हजार ९६३ मत प्राप्त गरेकी थिइन् । उनीहरु बीच १८ हजार १७३ मतको अन्तर रहेको छ । तोसिमाकै क्षेत्रबाट उम्मेदवार बनेकी ऊर्जामन्त्री एवम् नेकपा माओवादी केन्द्रको उपमहासचिव पम्फा भुसाल समेत निकै पछि परिन् । भुसालले मात्र ८ हजार ७६९ मत प्राप्त गरेकी छन् ।

यसरी हाई प्रोफाइलमै रहेका नेताहरुलाई पराजित गर्दै संसद यात्रा तय गरेकी तोसिमाले आफू नै नीति निर्माण गर्ने र कार्यान्वय गर्ने थलोमा पुगेपछि चिकित्सा क्षेत्रका समस्या समाधानमा के–कति गर्न सक्ने छिन् हेर्न बाँकी नै छ ।

प्रतिकृया दिनुहोस्

Flash News

नेवार कन्याहरुको ईहि शुरु भिम रावललाई बालेनको जवाफ: ‘तपाईंहरू जस्तो विदेशीसँग सहयोग माग्ने रहर छैन’ धनगढीमा शनिबार बिहानसम्म निषेधाज्ञा थप कैलाली प्रहरीको नियन्त्रणमा रहेका विद्यार्थीलाई रिहाइ गर्न विद्यार्थी संगठनहरूको माग आज बिहानदेखि रोकिएको बाजुराको मतगणना पुनः सुरु सरसफाइकर्मीका परिवारलाई स्वरोजगार र उद्यममा जोड्छौ: पाण्डे बैतडी हत्या प्रकरण : दोषिलाई तत्काल कानुनी दायरामा ल्याउन कर्मीको माग कम्बोडिया पठाइदिन्छु भन्दै ठगी गर्ने व्यक्ति पक्राउ निबन्ध लेखन प्रतियोगितामा इडन प्रथम वर्तमान निर्वाचन कानूनसँग सन्तुष्ट छैनौं : प्रमुख आयुक्त थपलिया माओवादी केन्द्रसँग पार्टी एकता हुने हल्ला निराधार : एकीकृत समाजवादी भीम रावलको प्रश्न : परराष्ट्र मन्त्रालयको अनुमतिमा बालेन साहले अमेरिकी राजदूतलाई भेटेका हुन् ? अपाङ्गताको न्यायमा पहुँच सहजताका लागि साझा पहल जरुरी अघिल्लाे चुनावमा दुई लाख मत कटाएकाे विवेकशील साझालाई समानुपातिकतर्फ ७८९ मत मात्र कांग्रेसबाट समानुपातिकतर्फ को-को पुरुष सांसद बन्लान्, यस्तो छ हिसाब किताब पश्चिम नवलपरासीमा भन्सार छलेको ३० क्वीन्टल चिनी बरामद सरकारमा युवाहरुले नेतृत्व लिनु पर्छः डा.चन्द्र भण्डारी बाजुरापछि दोलखा (ख) मा पनि रोकियो मतगणना निषेधित क्षेत्रमा प्रदर्शन भएपछि धनगढीमा ८ राउन्ड हवाइ फायर, दर्जन बढी विद्यार्थी पक्राउ कपिलवस्तुमा भारतीय नागरिकमाथि गोली प्रहार