अब बुटवलमै सुतेर फिल्म हेर्न मिल्ने अत्याधुनिक मल्टिप्लेक्स

मंसिर १३,

ग्लोबल आवाज

बुटवल । पछिल्लो समय बुटवलमा अत्याधुनिक र डिजिटल प्रविधिका मल्टिप्लेक्स खुल्ने क्रम बढेको छ । यसै क्रममा बुटवलको भाटभटेनीमा डिजिटल मल्टिप्लेक्सका रुपमा तेस्रो र सबैभन्दा ठूलो मल्टिप्लेक्स सञ्चालनमा आएको छ । काठमाण्डौं उपत्यकापछि बुटवलका दर्शकहरुले पनि अब प्रविधियुक्त र स्तरिय सुविधा सहित फिल्म हेर्न पाउने भएका छन् । दर्शकले सुतेरै फिल्म हेर्न मिल्नेगरी बुटवलको भाटभटेनीमा क्यूएफएक्स सिनेमाजले नयाँ मल्टिप्लेक्स शुभारम्भ गरेको हो ।

३ सय ६८ क्षमताको मल्टिप्लेक्समा डेफ्ट क्यू थ्री डी प्रविधि प्रयोगगरिनुका साथै दुई वटा स्क्रिन सहितको यस हलमा डल्बी एट्मोस साउण्ड प्रविधिको प्रयोग गरिएको रिगल सिनेमाज् प्रा.लि.का अध्यक्ष तथा क्यूएफएक्स निर्देशक नाकिम उद्धिनले बताए । भाटभटेनीको पाँचौ तल्लामा रहेको मल्टिप्लेक्सको शुभारम्भ गरिएको जानकारी गराउन शुक्रबार आयोजना गरिएको पत्रकार सम्मेलनमा बोल्दै क्यूएफएक्सका अथोराइज मार्केटिकङ लाइन्जका विवेक पोखरेलले हलबारे जानकारी गराए । स्तरीय साउण्डसँगै स्तरीय भिडियो क्वालीटी रहेको स्क्रिनमा फ्लिम हेर्ने अवसर जुराएको कम्पनीको देशभर ११ वटा मल्टिप्लेक्समा २५ वटा स्क्रिन रहेको उनले जानकारी गराए ।

कम्पनीले यसै महिना विराटनगरको भाटभटेनी सुपरमार्केटमा समेत २ स्क्रिन सहितको मल्टिप्लेक्स सञ्चालनमा ल्याउने तयारी रहेको क्युएफएक्सका सिइओ रोशन अडिगले जानकारी गराए । बुटवलको अमर पथमा रहेको भ्यू सिमा र राजमार्ग चौराहमा द्वारिका उदय यसअघि नै सञ्चालनमा आएका डिजिटल सिनेमा हल हुन् ।