ओली राष्ट्रबादी नभई लम्पसारबादी : देउवा

मंसिर ९,

सुमन केसी / ग्लोबल आवाज

दाङ । नेपाली कांग्रेसका सभापति शेरबहादुर देउवाले प्रधानमन्त्री ओली राष्ट्रबादी नभई लम्पसारबादी भएको बताए । सोमबार नेपाली कांग्रेस दाङले निर्वाचन क्षेत्र नं. ३ (ख) को श्रीगाउँमा आयोजना गरेको चुनावी सभालाई सम्वोधन गदै उनले यस्तो बताए । उनले राष्ट्रबाद, राष्ट्रबाद भन्दै प्रधानमन्त्री ओलीले बोल्ने गरेको भएता पनि आज उनको राष्ट्रबाद कालापानीमा लम्पसारबाद भएको बताए ।

पूर्वप्रधानमन्त्रीसमेत रहेका देउवाले ओली राष्ट्रबादी नभई नाटक गरेको उनले बताए । प्रधानमन्त्री ओलीले राष्ट्रबादको कुरा गरेर चुनाव जितेको भएता पनि आज कालापानीमा जोडिएर लम्पसारबाद भएको आरोप लगाए । त्यसैगरी कम्युनिष्ट सरकारले करको भार बोकाएर जनतालाई आर्जित बनाएको भन्दै उनले अब यो सरकारलाई सच्याउन कांग्रेसलाई जिताउन आवश्यक रहेको बताए । अहिलेको सरकारले विकास निमार्णका कार्यको उपभोक्ता समितिमा आफ्ना कार्यकर्ता भर्ने र प्रत्यक्ष सरकारी कोषमा लुट मच्याएको भन्दै देउवाले आक्रोस पनि पोखे ।

देशको स्वतन्त्र न्यायपालिका भित्र सत्ताको हस्तक्षेप भएको उनको भनाई छ । त्यसैगरी सभापति देउवाले पार्टीमा सवैलाई मिलाएर लगेको बताए । उनले महिला, आदीबासी, जनजाती लगायत सवै समुदायलाई नेपाली कांग्रेसले मात्र समावेशी ढंगले समेटेको बताए । त्यसैगरी उनले कांग्रेस जति विकास कम्युनिष्ट सरकारले नगरेको बताए । कम्युनिष्टले धेरै विकास गरेका छौँ, भनेर भ्रम फैलाएका छन् । उनले भन्ने । अहिले जति पनि विकास भएको छ, त्यो सबै नेपाली कांग्रेसको पालामा शुरु भएका हुन । त्यसैगरी सभापति देउवाले प्रदेश ५ को राजधानी तत्कालिन अवस्थामा आफु नेतृत्व सरकारले अस्थायी राजधानी बुटवल तोके पनि अहिलेको कम्युनिष्ट सरकारले दाङ राजधानी बनाउन नसकेको बताए ।

कार्यक्रममा नेपाली कांग्रेसका बरिष्ठ नेता रामचन्द्र पौडेलले अहिलेको सरकारले देशको शान्ति सुरक्षालाई भगं पारेको संज्ञा दिए । उनले भन्ने, द्धण्दकालमा ठूलो लडाई लडेर नेपाली कांग्रेसले देशमा संघीय लोकतान्त्रिक गणतन्त्र ल्यायो तर अहिलेको सरकारले यसलाई उल्टो गति तर्फ लैजान खोजिरहेको छ । साथै उनले मंसिर १४ मा हुन लागेको उप–चुनाव सरकार बदल्ने वा बनाउने नभएपनि आफैमा महत्वपूर्ण भएको बताए ।

त्यस्तै नेपाली कांग्रेसका नेता तथा पूर्व अर्थमन्त्री डा. रामशरण महतले कम्युनिष्टको ज्याजदी रोक्न नेपाली कांग्रेसको रुख चिन्हमा मतदान गर्न आग्रह गरे । कम्युनिष्टले जनतालाई पैसा बाँडेर राजनीति गरिरहेका छन, उनले भन्ने, पैसा बाँडेर राजनिति गर्नु गलत हो, देशमा शान्ति र लोकतन्त्रलाई बचाउन कांग्रेसलाई मतदान गर्नुहोस् । कार्यक्रममा कांग्रेस केन्द्रीय सदस्य डा. शेखर कोईरालाले नेकपाको सरकार अत्यन्तै गैर जिम्मेवार ढंगले अगाडि बढेको हुँदा त्यो रोक्न नेपाली कांग्रेसका उम्मेदवारको पक्षमा मतदान गर्नुपर्ने बताए ।

त्यस्तै कांग्रेस सह–महामन्त्री डा. प्रकाशशरण महतले जनताका सामु काम गरेर देखाउने पार्टी भनेको नेपाली कांग्रेस मात्र भएको दावी गरे । उनले अहिलेको सरकारले धर्म संस्कृति रक्षा गर्नुको साटो धर्म संस्कृति प्रनि आक्रमण गरेको समेत बताए । कार्यक्रममा कांग्रेस नेता कृष्णा सिटौला, केन्द्रिय सदस्य एवं पुर्वमन्त्री दिपक गिरी, केन्द्रिय सदस्य देबेन्द्रराज कंडेल, नेपाली कांग्रेसकी केन्द्रिय सदस्य महिला नेतृ सिला खड्कालगायतले चुनावी सभामा सम्बोधन गरेका थिए ।