बाला चतुर्दशी : सत्बिज छरी श्रद्धाञ्जली दिँदै

मंसिर ९,
ग्लोबल आवाज

Advertisement

बुटवल । आज बाला चतुर्दशी अर्थात् सत्बिज छर्ने दिन दिवंगत आफन्तजनको आत्माको चिरशान्तिको कामना गर्दै देशभरका विभिन्न शक्तिपीठमा सत्बिज छरेर मृतक आफन्तजनमा श्रद्धाञ्जली अर्पण गरी मनाइँदै छ । रुपन्देहीका विभिन्न शिवालयहरुमा पनि सत्बिज छरेर पूजा–आजा गरी यो पर्व मनाइँदैछ । मार्ग कृष्णपक्षको त्रयोदशीका दिन राति शिवालयमा परिवारका मृतक सदस्यको सद्गतिको संकल्पसहित दीपदान र चतुर्दशीका दिन आज सत्बिज छरी मनाइन्छ ।

महादिप बाली पूजापाठ गरेर रातभर जाग्राम बसी धान, गहुँ, जौं, मास, मुगी, कागुन र सामा मिलाइएको सप्तधान्ययुक्त सत्बिज छरे पीतृहरुले मोक्ष प्राप्त गरी आफ्ना सन्तानलाई सुख र समृद्धिको आशिर्वाद दिन्छन् भन्ने धार्मिक बिश्वास छ । नेपालमा मनाइने विभिन्न धार्मिक संस्कृतिमध्येको बालाचर्तुदशीलाई विशेष गरी सनातन हिन्दू धर्मअन्तर्गत विशिष्ट महत्वको पर्व मान्ने गरिन्छ ।

बालाचतुर्दशी पर्वलाई सत्बिज रोपण पर्वका रुपमा लिँदै विशेष गरी पितृ उद्धारका लागि उनीहरुको सम्झनामा सत्बिज छर्ने गरिन्छ । यसरी दीपदान गर्नाले मृतकले सद्गति प्राप्त गर्ने धार्मिक विश्वास रहिआएको छ । धार्मिक विश्वास अनुसार रुपन्देहीको सैनामैना स्थित पर्रोहा बोलबमधाम,बुटवल नयाँगाउँ स्थित मुक्तिधाम , सिद्धबाबा धाम लगाएतका शिवालयहरुमा बिहानैदेखि सत्बिज छरिँदैछ । चतुर्दशीका दिन बिहानै मृगस्थली क्षेत्रमा धानका सय बीउ छरेमा जन्मने र मर्ने प्रपञ्चबाट मुक्त भइने किंवदन्ती रहेको छ ।