धुर्कोटले तलब बढायो, बालविकास सहयोगीको १५ हजार

गुल्मी । संघीय सरकारले विद्यालयका बालविकास सयोगी कार्यकर्ताहरुलाई न्यून पारिश्रमिक दिएर चरम शोषण गरिरहेका बेला गुल्मीको एक स्थानीय तहले भने उनीहरुको तलब वृद्धि गरेर मासिक १५ हजार पुर्याएको छ। जिल्लाको धुर्कोट गाउँपालिका सरकारले बालविकास सहयोगी कार्यकर्ताको तलब मासिक १५ हजार पुर्याएको हो।

Advertisement

बिहीबार बसेको कार्यपालिका बैठकले उनिहरुको मासिक १५ हजार र विद्यालयहरुका कार्यालय सयोगी कर्मचारीहरुको पनि तलब वृद्धि गर्ने निर्णय गरिएको धुर्कोट गाउँपालिका प्रमुख भुपाल पोखरेले जानकारी दिए। उनका अनुसार प्रावि कक्षा १ देखि ३ सम्म पढाउने विद्यालयका कार्यालय सयोगीहरुको तलब वृद्धि गरि १० हजार पुर्याएको छ।

त्यस्तै कक्षा १ देखि ५ सम्मका प्राविका कार्यलय सयोगीको तलब मासिक १० हजार ५ पुर्याइएको छ । कक्षा १ देखि ८ सम्म पढाउने विद्यालयका कार्यालय सयोगीहरुको तलब मासिक ११ हजार पुयाइएको छ। त्यस्तै १ देखि १० सम्म पढाउने विद्यालयका कार्यालय सयोगीहरुले मासिक तलब १२ हजार पाउने भएका छन् । कक्षा १ देखि १२ सम्म पढाउने विद्यालयका कार्यालय सयोगीहरुलाई मासिक १३ हजार तलब दिइने भएको छ ।

पालिकाकी प्रवक्ता कतिा बिकका अनुसार प्रशासन सहायक वा लेखा सहायकको तलब वृद्धि गरि १८ हजार ५ सय पुर्याइएको छ । अन्य करारका कर्मचारीहरुको मासिक २ हजारका दरले तलब वृद्धि गरिएको छ । धुर्कोटको यस्तो निर्णयबाट विशेषगरी बालविकास सहयोगी कार्यकर्ता र विद्यालय सहयोगीहरु उत्साहित भएका छन् ।