ताजा अपडेट »

‘सम्झना’

शुक्रबार, ११ असार २०७८, १२ : २४
60 Shares


समयको बेगले
घरी यता, घरी उता हुत्याउँदा
हातमुख जोड्ने बिवशताले
अलग–अलग बाटो डोर्याउँदा
तिमी तिम्रो राजमार्ग अनि म मेरो गोरेटो पछ्याइरहँदा
के तिमीलाई पनि मलाई जस्तै अतित का यादहरु ताजै छन् साथी ?

ती रुँदै स्कूल कुदेका पल
ती हाँस्दै खोला धाएका पल
बाटाभरी ऐसेलु र चौतारी खोसाखोस गरेका क्षण
खोलै तर्काएर माछा भन्दै चेपा मारेका क्षण
त्यो मोजाको भकुण्डो
त्यो ढुङ्गाको लक्कु
हामी चोर , तिमी पुलिस
के यस्तै अतितका पलहरु मलाई जस्तै तिमीलाई पनि ताजै छन् साथी ?

ती सलाईका तास
ती चुङ्गीका खात
झोला भरीका गुच्चा
त्यो थालको मादल
त्यो चौताराको पिङ्ग
त्यो चारपाटे ढुस
हार्दा निधारभरीको चोट
अनि सुटुक्क घर पुग्दा,
बा को चुटाई, हजुरबाको भकारी भरीको माया ।
सपना जस्तै लाग्ने ती अतितका छाल, मलाई जस्तै के तिमीलाई पनि सम्झना छ साथी ?

कहिलेकाही भक्कानिन्छु साथी
अतित बल्झिन्छ र पो सम्झिन्छु
गमेर ती बितेका पल ।
त्यो पेप्सीको घोएत्रो
त्यो भुड्की फोरेर किनेको चिम–चिमे घडी
लट्टू नचाउँदाको खुसी
त्यो ककफाइट को मजा अनि हुतुुतुतु…
जीवन जीउने चक्करमा कतै टाढा
धेरै टाढा, नौ डाडापारी छुटेका यी समयका खेलहरु
के मलाई जस्तै तिमीलाई पनि ताजै छन् साथी ?
के मलाई जस्तै तिमीलाई पनि ताजै छन् साथी ?

https://www.globalaawaj.com/archives/109836
ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।