ताजा अपडेट »

शारीरिक सुगठनका अथक यात्री अनिल

बुधबार, २६ कार्तिक २०७७, १९ : ००
58 Shares
बुधबार, २६ कार्तिक २०७७
58 Shares

आज हामी नेपाली शारीरिक सुगठन खेलमामा लामो समय निरन्तरता दिँदै आएका एक अहिर्निश खेलाडी अनिललाल श्रेष्ठका बारेमा चर्चा गर्दै छौ । पिता इन्द्रलाल श्रेष्ठ र माता कमला श्रेष्ठको सुपुत्रका रुपमा वि.सं. २०३४ सालमा काठमाडौंको ठहिटीमा भएको थियो । यद्यपि, उनको मुल थाकथलो भने साँखु, काठमाडौं हो ।

युवा उमेरमा हलिउडका चर्चित अभिनेता अर्नोर्डका खाईलाग्दो र भिमकाय शरीर संरचना र शारीरिक बनावटबाट अभिप्रेरित भई अनिल शारीरिक सुगठन खेल तर्फ आकर्षित हुन थाले । वि.सं. २०४८ सालतिर रु ३०० मासिक भाडामा एक कोठा लिएर केही सामानहरूको जोहो गरेर साथीभाइसँग मिलेर व्यायाम गर्न सुरु गरे । पछि २०५३ सालमा भने गम्भीर जंग रायमाझीले सञ्चालन गरेको बानेश्वर जिमखानामा उनीले सदस्यता लिए । उनको पहिलो शारीरिक सुगठन प्रतियोगिता २०५७ सालमा धरानमा आयोजना भएको मिष्ट्रर पूर्वाञ्चल प्रतियोगिता हो । जसमा उनी ६० केजी तौलसमूहमा प्रतिस्पर्धा गर्दै तेस्रो हुन सफल भए । सोही साल नेपाल व्यायाम मन्दिरले आयोजना गरेको आठौं धर्मश्री खुला राष्ट्रब्यापी शारीरिक सुगठन प्रतियोगितामा सहभागी हुदै ६० केजी तौल समूहमा चौथो हुन सफल भए ।

वि.सं. २०५८ सालमा आयोजित प्रथम मिष्ट्रर बागमतीमा ६० केजीमा छैठौं स्थानमा चित्त बुझाए । ०६३ सालमा आयोजना भएको बागमती बडी बिल्डिङ च्याम्पियनशिपमा उनी ७० केजीभन्दा माथिको समूहमा चौथो भए । वि.सं. २०६८ सालमा आयोजना भएको बाह्रौ धर्मश्री प्रतियोगितामा उनी पुनः ६० केजीमा चौथो स्थान प्राप्त गरे । २०७० सालमा राष्ट्रिय खेलकुद परिषदद्वारा आयोजित चौधौ राष्ट्रिय शारीरिक सुगठन प्रतियोगितामा उनी ८० केजी तौल समूहमा चौथो भए । २०७१ सालमा आयोजना भएको तेहौ धर्मश्री प्रतियोगितामा उनी ७० केजी तौल समूहमा छैठौं स्थानमा चित्त बुझाए ।

वि.सं. २०७१ सालमा भएको पाँचौं मिस्टर हिमालयलाई उनी आफ्नो शारीरिक सुगठन खेलका यात्राको टर्निङ्ग प्वाइन्टका रुपमा मान्छन् । जसमा हुने ६५ केजी तौल समूहमा स्वर्णपदक लिन सफल भए । विगतका पन्ना पल्टाउँदै उनी भन्छन्, ‘त्यस प्रतियोगिताभन्दा अधि म शारीरिक सुगठनका प्रतियोगिताहरु खेल्नका लागि मात्र खेलिरहेको थिए तर त्यो प्रतियोगिता जित्नका लागि मैले राम्रो तयारी र कडा मेहनत गरेको थिएँ ।’ त्यसपछि उनले कहिल्यै पछाडी फर्केर हेनु परेन् । वि.सं. २०७२ सालमा हिमालय किङ्गडम बडी बिल्डिङ्ग फडरेशनबाट आयोजित प्रथम मिस्टर नेपाल शारीरिक सुगठन प्रतियोगितामा ६५ केजी तौल समूहमा रजत पदक प्राप्त गर्न सफल भएका थिए ।

वि.सं. २०७३ सालमा आयोजित चौधौ धर्मश्री प्रतियोगितामा उनी ६५ केजी तौल समूहमा रजत पदक प्राप्त गरे । सोहि सालमा आयोजित दोस्रो बुल्समैनमा उनी ६५ केजी तौल समूहमा रजतपदक ल्याउने सफलता पाए । ०७४ सालमा आयोजित छैठौं मिस्टर हिमालयमा ६५ केजी तौल समूहमा उनी चौथो भए । ०७५ सालमा बुटवलमा आयोजित सोह्रौ राष्ट्रिय शारीरिक सुगठन प्रतियोगितामा उनी ६५ केजी तौल स्वर्णपदक हात पार्दै मिस्टर नेपालको उपाधि लिन सफल भए । अनिलले नेपालमा मात्र नभएर विदेशमा समेत शारीरिक सुगठन प्रतियोगितामा सहभागिता हुने अवसर पाएका थिए ।

वि.सं. २०७२ सालमा थाइल्यान्डमा भएको आठौं विश्व शारीरिक सुगठन प्रतियोगितामा उनी ६५ केजी तौल समूहमा छैठौं भए । २०७३ सालमा पाकिस्तानमा आयोजना भएको दक्षिण एसियाली शारीरिक सुगठन प्रतियोगितामा कास्यपदक प्राप्त गर्न सफल भएका थिए । गम्भीर जंग रायमाझीलाई आफ्नो जिम प्रशिक्षकको रुपमा मान्ने अनिलले झन्डै ६ वर्ष जति वैदेशिक रोजगारीको सिलसिलामा साउदी अरबिया समेत पुगेका थिए । त्यहाँ उनले चर्चित जिम ताजमा ट्रेनरका रुपमा काम गरेर अनुभव लिने अवसर समेत पाए । जीवनमा आफुलाई सबैभन्दा खुशी लागेको क्षणको रुपमा दक्षिण एसियाली शारीरिक सुगठन प्रतियोगितामा पाकिस्तानमा कास्यपदक प्राप्त गर्दाको पललाई मान्छन् ।

नेपाल सरकारले अन्य खेलको तुलनामा शारीरिक सुगठनलाई खासै चासो नदिएको देख्दा उनलाई निकै दुःख लागेको उनी बताउँछन् । हाल उनी पुरानो बानेश्वर बसोबास गर्छन । उनी जोरपाटीमा आफ्नै लगानीमा सञ्चालित पावर फिटनेश एण्ड जिममा आफु जस्तै प्रतिभाशाली खेलाडी तयारीमा भिडेका छन् । आफ्नो शरीरिक पोजहरु मध्ये साइड चेष्ट उनलाई मनपर्छ ।

प्रतियोगिताको अवधिमा उनको प्रतिदिन डाइटमा चिकेन ब्रेष्ट ८०० ग्राम, अन्डा दशवटा, सागपात २५० ग्राम, माछा २५० ग्राम र ब्राउन राइस २०० ग्राम हुने गर्छ । अनिललाल श्रेष्ठको लामो शारीरिक सुगठन खेल यात्रा तथा यस खेल प्रतिको उनको समर्पण भावको उच्च सम्मान गर्दै उनलाई मदन भण्डारी स्पोर्ट्स एकेडेमीबाट सम्मान समेत गरिएको छ ।

सितु प्रसाद श्रेष्ठ
लेखकको बारेमा
सितु प्रसाद श्रेष्ठ
स्तम्भकार