२६ हजारको जागिर छोडेर तीनलाख लगानीमा मासिक ५० हजार आम्दानी

बुटवल । नवलपरासीको रामग्राम नगरपालिका ७ देउरवाका प्रदिप चमार बिहानको ७ नबज्दै परासी बजार, बर्दघाट, भुताहा, भुमह देखि भारतीय सिमाना महेशपुर बजारसम्म चाउमिनको बेच्न पुग्छन् । दिन भरी ताजा चाउमिन उत्पादन गर्ने र अर्को दिन बिहानपख गाउँघरका स्थानीय होटलदेखि बजारका ठुला व्यवसायीकहरूका होटलमा पुगेर चाउमिन बेच्दै उनको दैनिकी बित्छ । पहिला बिना काममा गाउँमा डुल्ने प्रदिपलाई गाउँलेहरू उदाहरणीय पात्रको रूपमा लिने गरेका छन्।

करिब ११ महिना भयो, उनी आफ्नै पौरखमा लागेको, करिब दश वर्ष पहिले काम खोज्दै जाँदा उहाँ बुटवलको एक चाउमिन उद्योगमा काम पाएपछि यस विषयमा सिप विकास भएको उनले बताउन्छन् । बुटवलको चाउमिन उद्योगमा मासिक २६ हजार रुपैयाँको तलब छाडेर आफ्नै उद्योग सञ्चालन गरे । बुटवलबाट पुराना उपकरणहरू खरिद गरी गाउँमै उद्योग सञ्चालन गर्दा आजभोलि उहाँको उद्यमशीलता लगनशीलता देखेर गाउँका मान्छे छक्कै पर्छन्, रोजगार छैन, काम छैन, कमाई छैन भनेर सयौ गाउँका युवा विदेशीरहेको अवस्थामा उदाहरणका रूपमा २९ वर्षीय प्रदिपले देउरवा गाउँमै “माँ पाल्ही भगवती चाउमिन तथा सस उद्योग “खोलेर मासिक मासिक ५० हजार सम्म आम्दानी गरेका छन् ।

करिब ३ लाखको लागतमा उद्योग स्थापना गरी गाउँमै ताजा चाउमिन उत्पादन गर्न सुरु गरेको उनले आफूसहित आफ्ना सातजनाको परिवार पाल्न सफल भएका छन्। ‘अहिले दैनिक एक कुन्टल मैदाबाट बनेको चाउमिन बिक्री गरिरहेको छु ’-चमारले भने । चाउमिन प्रतिकिलो रु ६५ मा बिक्री भइरहेको छ । उद्योगले दैनिक ४० किलोदेखि १०० किलोसम्म चाउमिन उत्पादन गर्छ । २ लाख ५० हजारको लगानी गरेर, पीठो पेल्ने मेसिन, मिक्चर लगायतका बुटवलबाट उपकरणहरू खरिद गरी सुरु गरेको सो उद्योगबाट मासिक करिब करिब ५० हजारसम्म आम्दानी हुने गरेको छ । ‘ छोराछोरी पढाउन र घरखर्च चलाउन सहज भएको छ । घर परिवारका सदस्यलाई पनि कामको व्यस्तता बढेको छ ।’–उनले भने ।