ताजा अपडेट »

सिद्धार्थ राजमार्ग भासियो : ठूला सवारीका साधन आवागमन ठप्प

शनिबार, १७ साउन २०७७, १७ : ०६
18 Shares

बुटवल । सिद्धार्थ राजमार्गको बुटवल–पाल्पा खण्डमा सडक भासिएपछि शनिबार देखि ठूला सवारीका साधान आवागमन ठप्प भएको छ । लगातारको वर्षाले तिनाउ–३ झुम्सा र पानी मिलको बीचमा पर्ने राजमार्ग भासिएको हो । विहिबार सामान्य चिरा परेको पिच सडक शनिबार १ मिटर तल खस्किएपछि ठूला सवारीका साधान आवागमन ठप्प भएको छ । सडक डिभिजन कार्यालय पाल्पाका इन्जिनियर शिव खत्रीका अनुसार करिब २० मिटर लामो सडकको आधा भाग भित्रि जमिन देखि नै भासिएको हो ।

सडक भासिएपछि तत्कालका लागि बीचबाटोमा अलपत्र परेका ठूला सवारीका साधनलाई गन्तव्यमा पुर्याउन भासिएको ठाउँमा मिस्कटले पुर्ने काम भइरहेको छ । ‘तत्कालका लागि भासिएको सडकमा मिस्कट हाल्ने काम हुँदै छ । यो दिर्घकालीन समाधान भने होइन ।’ ग्लोबल आवाजसँग कुरा गर्दै खत्रीले भने ‘भोली सडकको कुनाबाट कटिङ गर्ने भनेका छौ । कटिङ गर्दा माटो अढियो भने समस्या समाधान होला नत्र समस्या पर्न सक्छ ।’

भासिएको सडकमा अहिले ठूला सवारी साधन आवतजावत गर्न सक्ने अवस्था छैन । चार पाङग्रे हलुका सवारीका साधन जेनतेन चल्न सक्छन् । भासिएको ठाउँमा जोखिम रहेकाले चारपाङग्रे हलुका सवारी बाहेक ठूला सवारी साधन सञ्चालनमा रोक लगाएको ट्राफिक प्रहरी कार्यालय पाल्पाले जानकारी गराएको छ । यो सडकखण्ड हुँदै बुटवलदेखि पाल्पा, गुल्मी, अर्घाखाँची, स्याङ्जा, बागलुङ, पर्वत, कास्कीलगायतका ठाउँमा ठूला मालवाहक र यात्रुवाहक सवारी साधन चल्ने गर्छन् ।

हाल सडक भासिएको ठाउँमा विगत १०/१५ वर्ष अघि देखि नै ठूलो पानी परेको अवस्थामा भासिने गरेको स्थानीहरु बताउँछन् । ‘झुम्साको पानी मिल तथा वरपरका सडकहरु पहिले देखि नै भासिरहने समस्या हो ।’ तिनाउ गाउँपालिका प्रवक्ता राजेश श्रेष्ठले भने हरेक वर्षजसो भासियर यस क्षेत्रमा माथीबाट मिस्कटले पुरेर काम चलाउने बाहेक अन्य भरपर्दो विकल्प खोजिएको छैन ।’ हरेक वर्ष वर्षाको समयमा ज्यान जोखिममा राखेर बुटवल-पाल्पा सडक खण्डमा यात्रा गर्नु पर्ने वाध्यता रहेको छ ।

केही वर्ष पहिले खोलिएका चरङ्गे–झम्सा बाइपास मोटरबाटो पनि मर्मतको अभावमा ठाउँ–ठाउँमा पहिरोले पूरिएर अवरुद्ध बनेको छ । यसैगरी बुटवल नुवाकोट सडकलाई समेत वैकल्पिक रुपमा प्रयोग गर्न सकिने भए पनि सम्बन्धित पक्षको ध्यान जान नसकेको प्रवक्ता श्रेष्ठले बताए ।

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।