कांग्रेस निकट व्यक्तिद्वारा बाल उद्यान तोडफोड, शुद्धोधनका अध्यक्षको कार्यकक्षमा पनि तालाबन्दी

• 

बुटवल । नेपाली कांग्रेस निकट व्यक्तिहरुको अगुवाईमा रुपन्देहीमा निर्माणाधिन शुद्धोधन बाल उद्यान तोडफोड भएको छ । केही वर्ष पहिलेदेखि समसानघाटको रूपमा रहेको दर्बाह् क्षेत्र गाउँपालिका भन्दा १०० मिटर अगाडि आवाश क्षेत्रले घेरिएको छ । गाउँपालिकाको निर्णय अनुसार समसान घाटको रूपमा रहेको १ विघा जमिनमा १ वर्ष अगाडि बालउद्यान निर्माण गर्ने भनी गाउँपालिकाबाट १ करोड र प्रर्यटन मन्त्रालयबाट ३० लाख बजेट बिनियोजन गरि ठेक्कापट्टा मार्फत काम अगाडि बढेको थियो ।

साथै नयाँ समसान घाट निर्माणका लागि १५ लाख बजेट विनियोजन गरिसेकेको र केही दिनमै काम अगाडि बढाउन लागेको अवस्थामा रहेको बुझिएको छ । केही दिन अगाडि नेपाली कांग्रेस शुद्धोधन गाउँपालिका सभापति शेरबहादुर काफ्लेको नेतृत्वमा आएको एक समुहले अहिले रहेको समसान घाटलाई अन्यत्र सार्न नहुने भन्दै विरोध पत्र गाउँपालिकालाई बुझाएका थिए । तत्कालै गाउँपालिकाले वार्ता समिति गठन गरि वार्ता चलिरहेको बेलामा शुक्रबार एक हुल समुहले बाल उद्यान तोडफोड गरी गाउँपालिका अध्यक्षको कार्यकक्षमा तालाबन्दी गर्नुका साथै वार्ता समितिका संयोजक वडा नम्बर ५ का वडा अध्यक्ष पुन्य गौतमलाई अभद्र व्यवहार गरेको गाउँपालिका अध्यक्ष किशुनचन चौधरीले बताए ।

साथै वार्ता चलिरहेको बेलामा विकास विरोधि गतिविधिमा कांग्रेसका जिम्मेवार नेताहरूनै लागेकोप्रति आफुलाई दु:ख लागेको बताउँदै निष्पक्ष छानबिन गरि दोषीमाथि कारबाही गर्ने बताए ।