भारतलाई नेपालको जवाफः ‘कालापानी, लिम्पियाधुरा हाम्रो हो, आवतजावत गर्न अनुमति चाहिँदैन’

काठमाडौँ । भारत धार्चुलाका उपजिल्ला अधिकारीले जुलाई १४ मा गुन्जी, कालापानी र लिम्पियाधुरा क्षेत्र आफ्नो भएको दाबी गर्दै नेपालीको प्रवेशमा रोक लगाउन दार्चुलाका प्रमुख जिल्ला अधिकारीलाई पत्राचार गरेका थिए । त्यसको जवाफ मंगलबार नेपालले दिएको छ ।

जिल्ला प्रशासन कार्यालय दार्चुलाले भारतलाई पत्र पठाउँदै गुन्जी, कालापानी र लिम्पियाधुरा नेपाली भूमि भएकाले त्यहाँ जान स्वभाविक रहेकाे र भारतको अनुमति आवश्यक नरहेको जवाफ फर्काएको हो ।‘सन् १८१६ मा सम्पन्न सुगौली सन्धीको धारा ५ र त्यस चरणमा प्रकाशित नक्सा एवम् तथ्य प्रमाणहरूका अनुसार कालीनदी र लिम्पियाधुरा, नाबी, कुटी, गुन्जी, कालापानी, लिपुलेक लगायतका क्षेत्र नेपालको भू-भाग रहेको कुरा प्रष्ट नै छ। उल्लेखित भू-भाग नेपाली भएको हुँदा नेपालीहरूको आवतजावत हुनु स्वभाविक नै रहेको र त्यसमा कुनै बाधा अड्चन हुनुहुँदैन भन्ने नेपाल सरकारको धारण रहेको जानकारी गराइन्छ।’ प्रमुख जिल्ला अधिकारी शरदकुमार पोखरेलले पठाएको पत्रमा उल्लेख छ ।

केही समयअघि नेपालले कालापानी, लिम्पियाधुरा, गुन्जी, लिपुलेक लगायतका भूभाग समेटेर नयाँ नक्सा जारी गरेको थियो । ती भूभागलाई भारतले आफ्नो भनेर कब्जा गर्दै आएको छ । सशस्त्र प्रहरीलाई पनि भारतीय पक्षले गस्तीका क्रममा रोक र अवरोध गरेको छ ।

Advertisement