तिलोत्तमामा चालु आर्थिक वर्षको कर असोजभित्र बुझाए १० प्रतिशत छुट

तिलोत्तमा । तिलोत्तमा नगरपालिकाले नयाँ आर्थिक वर्ष २०७७/७८ को कर २०७७ असोज मसान्तभित्र बुझाएमा १० प्रतिशत छुट दिने निर्णय गरेको छ । अघिल्लो आर्थिक वर्षको कर, दस्तुर र सेवा शुल्कलाई नयाँ आर्थिक वर्षमा पनि निरन्तरता दिएको नगरपालिकाले स्थानीय आर्थिक ऐनअनुसार कर छुटको व्यवस्था गरेको हो ।

Advertisement

यस्तै २०७७ पुस मसान्तभित्र कर बुझाउने करदाताले ५ प्रतिशत छुट पाउने नगरपालिकाले जनाएको छ । हरेक चालु आर्थिक वर्षको कर सोही आर्थिक वर्षमा तिर्नुपर्ने भए पनि कोराना महामारीको कारण आर्थिक वर्ष २०७६/७७ मा बुझाउनुपर्ने कर २०७७ असोज मसान्तसम्म बुझाएमा करमा हर्जाना नलाग्ने व्यवस्था नगरपालिकाले मिलाएको छ । तर अघिल्लो आर्थिक वर्षको कर कार्तिक १ पछि बुझाएमा २५ प्रतिशत हर्जाना लाग्ने नगरपालिकाले वडा कार्यालयहरुलाई गरेको परिपत्रमा उल्लेख छ ।

आर्थिक वर्ष २०७६/७७ भन्दा अघिल्ला आर्थिक वर्षको कर चालु आर्थिक वर्ष बुझाउन ल्याएमा लाग्ने कर रकमको ५० प्रतिशत रकम हर्जाना लाग्ने नगरपालिकाले जनाएको छ । नगरपालिकाको आर्थिक ऐनमा एकल महिलाको नाममा रहेको सम्पत्ति, कम्तिमा ५० जना नेपाली नागरिकलाई रोजगार दिने उत्पादनमुलक चालु उद्योगको नाममा रहेको सम्पत्तिमा लाग्ने करमा १५ प्रतिशत छुट दिने व्यवस्था छ ।

यस्तै कृषि उपज उत्पादन तथा पशुपंक्षीपालन व्यवसाय, महिला मात्र सदस्य भएको सहकारी संस्थाको व्यवसाय र वातावरण प्रदुषण कम गर्ने प्लाण्ड जडान गर्ने उद्योग एवं उत्पादन प्लाष्टिकको सट्टामा कपडा वा कागजमा प्याकिङ गर्ने उद्योगलाई लाग्ने व्यवसाय करमा ५० प्रतिशत छुट दिने नगरपालिकाको व्यवस्था छ । अपाङ्गता भएका व्यक्तिले सञ्चालन गरेका उद्योग व्यवसायमा लाग्ने व्यसाय करमा शतप्रतिशत छुट सुविधा नगरपालिकाले दिएको छ ।

यसैबीच तिलोत्तमा नगरपालिकाले यहीँ साउन १ र २ गते नगर कार्यपालिका र वडा कार्यालयबाट राजस्व संकलन कार्य नभएको जनाएको छ । राजस्वको सफ्टवेयर अपडेट गर्नुपर्ने भएकोले दुई दिन राजस्व संकलन कार्य बन्द रहेको नगरपालिकाद्धारा जारी सूचनामा उल्लेख छ ।