ताजा अपडेट »

सैनामैनामा मंसिर १२ देखि १ लाख ११ हजार पुरस्कार राशीको अन्तर जिल्ला भलिबल

सोमबार, १३ कार्तिक २०८०, १२ : ५०
14 Shares

बुटवल । रुपन्देहीको सैनामैनामा आगामी मंसिर १२ गतेदेखि अन्तरजिल्ला भलिबल प्रतियोगिता हुने भएको छ । स्थानीय दुधराक्ष युवा क्बलको आयोजनामा आगामी मंसिर १२ देखि १६ गतेसम्म आयोजना हुने प्रतियोगितामा विभिन्न १२ जिल्लाको सहभागिता रहने भएको छ ।

सैनामैना नगरको विकासमा अग्रसर रहेकी पुरानो बासिन्दा स्वर्गीय ढुण्डी थरुनीको स्मृतिमा सैनामैना–६ कलौनीमा ढुण्डी थरुनी स्मृति कप अन्तर जिल्ला स्तरिय भलिबल प्रतियोगिता २०८० हुने भएको हो । प्रतियोगिताका लागि सैनामैना नगरपालिका, प्रदेश खेलकुद परिषद लुम्बिनी, रुपन्देही भलिबल संघ रुपन्देही, सैनामैना नगर खेलकुद समितिको सहयोग रहेको छ ।

प्रतियोगिताको उपाधि विजेताले नगद १ लाख ११ हजार १ सय ११ ट्रफि, प्रमाण, उपविजेताले नगद ७७ हजार ७ सय ७७ रुपैया, ट्रफि, प्रमाणपत्र, तृतीय टिमले नगद ४४ हजार ४ सय ४४ रुपैया, ट्रफि, प्रमाणपत्रबाट पुरस्कृत गरिने खेल संयोजक विष्णु प्रसाद पाण्डेले बताए । यसैगरि सान्त्वना टिमले नगद २२ हजार २ सय २२ रुपैया, ट्रफि प्रमाणपत्र, विधागत उत्कृष्ट खेलाडीहरुलाई नगद ७ हजार ७ सय ७७ रुपैया तथा सर्वोत्कृष्ट खेलाडीलाई १५ हजार ५ सय ५५ रुपैयाबाट पुरस्कृत गरिने उनले बताए ।

क्लबका अध्यक्ष किरण पोखरेलले नेपालको राष्ट्रिय खेललाई प्रचारप्रसार र खेलाडीलाई प्लेटफर्म दिने उद्देश्यका साथ प्रतियोगिता गर्न लागेको बताए । बिस २०७३ जेठ ८ गते राष्ट्रिय खेल घोषणा भएसँगै यसको विकास र खेलाडी उत्पादनमा जोड दिन जरुरी रहेको उनले बताए । क्लब स्थापना भएसंगै युवाहरुलाई एकतावद्घ गर्दै नेतृत्व विकास र सामाजिक कार्यमा अग्रसर गराउदै आएको उनले बताए । छात्रवृत्ति वितरण, ट्राफिक सचेतना, लागुऔषध दुब्यसनी, रक्तदान, वृक्षारोपण, निशुल्क स्वस्थ्य शिविर गर्दै आएको उनले बताए ।

प्रतियोगिता बारे जानकारी गराउ आयोजित पत्रकार सम्मेलनमा सैनामैना नगरपालिकाका नगरप्रमुख फणेन्द्र शर्माले नेपालको भू–बनोटलाई सुहाउने, हिमाल, पहाड, तराईमा खेल्न सकिने खेल भएको बताए । युवाहरुलाई रचनात्मक बनाउने र स्वदेशमा अडाउने गरि योजना ल्याउन जरुरी रहेको उनले बताए । केन्द्र सरकारबाट विनियोजन हुने बजेट कम हुँदा आफ्नो पालिकामा खेलकुदको बजेट संकुचन गर्न परेको दुखेसो गर्दै क्लबबाट सैनामैनाको पहिचान हुने गरि आयोजना हुन लागेको प्रतियोगितालाई साथ र सहयोग गर्ने प्रतिवद्धता जनाए ।

उपप्रमुख बिना रानाले नगरको खेल विकासमा आफू संस्थागत रुपमा लागेको बताईन। कार्यक्रममा जिल्ला भलिबल संघ रुपन्देहीका अध्यक्ष सुरेन्द्र शाक्यले खेल विकासमा सरकारको लगानी न्यून हुँदा सोचेजस्तो सफलता हात पार्न नसकेको बताए । राष्ट्र र स्वस्थ्यको लागि खेलकुद नाराअनुसार सरकारबाट पुर्वाधार विकास र खेलाडीको क्षमता विकासमा लगानी गर्न आवश्यक रहेको उनले बताए ।

सैनामैना नगरपालिका वडा नं ७ का वडाअध्यक्ष तथा खेलप्रेमी राजकुमार चौधरीले आफनो हजुरआमा ढुण्डी थरुनीको स्मृतिमा आयोजना गर्न लागेको प्रतियोगितालाई २ लाख रुपैया सहयोग गरेका छन । लुम्बिनी प्रदेश र अन्यजिल्ला गरि १२ टिमहरुले भाग लिने प्रतियोगिता संचालन गर्न १६ लाख रुपैया खर्च हुने आयोजक क्लबका सचिव पदम पाण्डेले बताए ।

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।