बुटवल । गायक तथा संगितकार नारायण रायमाझीले निर्देशन गरेको पछिल्लो चलचित्र परदेशी २ को ट्रेलर सार्वजनिक भएको छ।

शुक्रबार म्युजिक नेपाल युट्युब च्यानलमार्फत चलचित्रको ट्रेलर सार्वजनिक गरिएको हो। सार्वजनिक गरिएको ट्रेलरमा विदेशमा रहेका नेपाली विद्यार्थी तथा गाउँघरमा रहेका आमाबुवाको कथा संगै भारतिय गोर्खा पल्टनमा सेवारत रहेका नेपाली यूवाको बहादुरी लाई पनि देखाइएको छ।

राजेश वंशल र निर्देशक रायमाझीको संयूक्त लगानी रहेको यो फिल्ममा प्रकाश सपूत, दीलिप रायमाझी, प्रशान्त तामाङ, केकी अधिकारी, वर्षा शिवाकोटी, नीर शाह, सुशील पोखरेल, सविन बास्तोला, रमा थपलिया, भीमा मैनाली, देवेन्द्र बब्लु, रोशनी कार्की लगायतको अभिनय छ। यो चलचित्र बाट प्रसिद्ध लोकगायक प्रकाश सपूतले नायकका रुपमा चलचित्रमा डेब्यू गरेका छन।

यस चलचित्रको कथा राष्ट्रिय लोक तथा दोहोरी गीत प्रतिष्ठानका अध्यक्ष समेत रहेका गीतकार रमेश बिजीले तयार पारेका हुन भने चलचित्रलाई मानकृष्ण महर्जनले छायांकन तथा दीर्घ खड्काले सम्पादन गरेका हुन। चलचित्र निर्देशक नारायण रायमाझीको तेश्रो चलचित्र हो । यस अघि उनले गोर्खा पल्टन तथा परदेशी जस्ता सुपरहिट चलचित्र निर्देशन गरेका थिए । यो चलचित्र बडा दशैंको अवसर पारेर यहि असोज २६ गतेदेखि देशभर प्रदर्शन हुदैछ ।