ताजा अपडेट »

बुटवलका मेयरलाई अनुगमन र निर्देशन दिन भ्याइनभ्याई !

शुक्रबार, १० चैत्र २०७९, १३ : ५२
37 Shares

बुटवल । बुटवल उपमहानगरपालिकाका प्रमुख खेलराज पाण्डेयको व्यस्तता बढेको छ । हरेक दिनजसो निर्देशन र अनुगमनका तस्विरहरु सामाजिक सञ्जालमा सार्वजनिक हुने गरेका छन् ।

यसैबीच आज शुक्रबार मात्रै उनले अनुगमन गरेका एक दर्जन स्थानका तस्विरहरु सामाजिक सञ्जाल फेसबुकमा सार्वजनिक गरेका छन् । दैनिक जसो बैठक तथा छलफल र निर्देशन दिएका समाचारहरु त सार्वजनिक भएका छन् नै त्यसैगरी छिन–छिनका गतिविधिलाई उनले सामाजिक सञ्जाल फेसबुकमा सार्वजनिक समेत गर्ने गरेका छन् ।

सार्वजनिक भएका उक्त तस्विरहरुमा आउने टिप्पणीहरुमा कार्य सफलताको शुभकामनासँगै कार्यान्वयन हुनेमा समेत आशंका व्यक्त गरिएका छन् । नगर प्रमुख पाण्डेयले सार्वजनिक गरेका तस्विरहरुमा अधिकांशले सकारात्मक र सफलताको शुभकामना व्यक्त गरेका छन् भने केहीले असन्तुष्टी पनि जनाएका छन् ।

नगर प्रमुख पाण्डेले शुक्रबार सार्वजनिक गरेका पहिलो तस्विरहरुमा टिप्पणी गर्दै फेसबुक प्रयोग कर्ता अर्जुन भण्डारी (एएसबी)ले लेखेका छन् ‘अवलोकन त मेयर भाको दिन बाटै भैरहेको छ मेयर ज्यु । काम हुन त्यस्तै भैरहेको छ । उपमहानगरपालिकाको दबाब भैरहेको भए आजसम्म यति धुलो धुँवामा बुटवल बासी बस्न पर्थिएन होला ।’ उनले अघि लेखेका छन्, ‘छिमेकी नगरपालिकाको काम हेरेर पनि अनुमान लगाउन सकिन्छ । बुटवल कसरी बन्दै छ । कहिलेसम्म बन्नी हो हाम्रो पुस्तालाई थाहा होला जस्तो लाग्दैन । बल्ल त ७/८ वर्ष भो अबको १० वर्षमा त बन्ला भन्नी लाग्छ मलाई ।’ सोही स्टाटसमा लेख कार्कीले लेखेका छन्–‘हेरेको त धेरै भो नि मेयर ज्यू ।’ यसैगरी उत्तम भुसालले लेखेका छन् –‘५ वर्ष कार्यकालमा त सकिएला के रे । ५ वर्ष अवधिको खेलो बुटवलको बाटो होला जस्तो छ मेयर साबको ।’

राजेन्द्र गौतमले भने प्रशंसा गर्दै भनेका छन्–‘काम होस त तेस्तो द्रुत गतिले होस धन्यवाद छ मेयर ज्यु । अझै भित्री गाउँ–गाउँको विकास तिर पनि ध्यानलाई केन्द्रीत गर्नुहोला धन्यवाद ।’ यसैगरी सागर पन्थीले लेखेका छन्–बुटवलमा धुलो र धुँवा अनि दुर्गन्ध कतै कहिल्यै नहोस् । हरियाली फुलबारी बाटोभरी होस दाइको अभियान सफल होस ।’

नगर प्रमुख पाण्डेयले शुक्रबार बुटवलभित्रका मुख्यमुख्य योजनाहरुको अनुगमन गर्दै वर्षाअघि नै सबै योजनाहरुको काम सम्पन्न गर्न निर्देशन दिएका छन् । चालु आर्थिक वर्षभित्र सम्पन्न गर्नुपर्ने संघ, प्रदेश र बुटवल उपमहानगरपालिकाको लगानीमा निर्माणाधीन योजनाहरुको नगर प्रमुख पाण्डेय, प्रमुख प्रशासकीय अधिकृत टेकराज पन्थीसहित बुटवल उपमहानगरपालिकाको टोलीले अनुगमन गरेको हो ।

बुटवलको गोलपार्कदेखि योगीकुटीसम्मको सडक क्षेत्र, योगीकुटीदेखि कालिका पथ क्षेत्र, योगीकुटीदेखि रानीगञ्जसम्मका सडक, अभियान पथको पर्खाल र निर्माणाधीन योजनाहरुको अनुगमन गदै प्रमुख पाण्डेयले समयमै काम सम्पन्न गर्न निर्माण कम्पनीहरुलाई सचेत गराएका छन् । उनले निर्माण शुरु गरेर निर्माण गर्नुपर्ने अवधिभित्र पूरा गर्नेलाई पुरस्कृत गर्ने र समयमा निर्माण पूरा नगर्ने कम्पनीलाई दण्डित गरिने बताएका छन् ।

नगरप्रमुख पाण्डेयले बुटवलभित्र निर्माण हुने संरचनाको काम समयमै सम्पन्न गर्नका लागि संघ र प्रदेशलाई समेत ताकेता गर्न आग्रह गर्ने र समयमा पूरा हुनसक्ने गरी बजेट विनियोजन भएका योजनाहरु समयमै पूरा नगर्ने निर्माण कम्पनीलाई कारबाहीका लागि सिफारिश गर्ने बताए ।

नदीजन्य पदार्थको चोरीनिकासी रोक्न अनुगमन
बुटवल उपमहानगरपालिकाको टोलीले तिनाउ नदीकिनार क्षेत्रको अनुगमन गर्दै नदीजन्य पदार्थको चोरीनिकासी रोक्नका लागि नियमित अनुगमन गर्न टोली खटाएको छ । बुटवलतर्फको नदीकिनार क्षेत्रबाट चोरीनिकासी बढेको पाइएको र सीमावर्ती स्थानीय तहहरुमा निर्माण भइरहेका संरचना र निर्माण कम्पनीहरुको समेत निगरानी गर्ने र स्थानीय तहहरुसँग छलफल गरेर नियमनमा ल्याउने बुटवल उपमहानगरपालिकाका नगर प्रमुख खेलराज पाण्डेयले बताए ।

उनले नदीजन्य पदार्थको चोरीनिकासी रोक्ने र आगामी वर्षामा बाढी र कटान रोक्नका लागि सुरक्षित बनाउने गरी काम गर्न योजना महाशाखा र विपद् शाखालाई निर्देशन दिए । प्रमुख पाण्डेयले नगरप्रहरीसहितको टोलीले नियमित रुपमा निगरानी गर्ने र चोरीनिकासी रोक्नका लागि स्थानीयको समेत साथ आवश्यक रहने बताए । उनले जिल्ला र नगरको सुरक्षानिकायलाई समेत चोरीनिकासमा थप संवेदनशील बन्नका लागि आग्रह गर्ने बताए ।

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।