ताजा अपडेट »

तिलोत्तमाबाट उदायका नेपाली क्रिकेटका नक्षेत्र कुशल, नगरपालिकाबाट ५० हजारको घोषणा

शनिबार, ०४ चैत्र २०७९, ०६ : ००
46 Shares

बुटवल । खेलकूद जगतमा गत विहिबार नेपाली क्रिकेटका लागि अविस्मरणीय क्षण रह्यो । हजारौं नेपाली दर्शकको बीचमा नेपालले आफूलाई अब्बल सावित गर्दै विश्वक कप क्रिकेट छनोटमा स्थान बनाउन महत्वपूर्ण खेल संयुक्त अरव ईमिरेट (युएई) लाई पराजित गर्नु पर्ने दबाबमा नेपाल थियो ।

नेपाली क्रिकेट टोलीलाई हौसला प्रदान गर्न मैदानमा पुगेका प्रधानमन्त्री पुष्पकमल दाहाल प्रचण्डसँग हात मिलाउँदै ईतिहास रच्ने कसम त थियो नै त्योभन्दा बढी खेल सुरु हुनुभन्दा २ घण्टा अघिनै मैदानमा प्रवेश गरेका तथा मैदान बाहिर जोखिम मोलेर घरको छत तथा रुखमासमेत चन्द्र सूर्य अंकित नेपालको झण्डा फहराउँदै झुम्मिएका दर्शकको भरोसालाई पनि कायम राख्नु पर्ने थियो । गर या मरको स्थितीमा रहेका नेपाली क्रिकेटरहरुले दर्शकको त्यो भरोसालाई कायम राख्दै आईसीसी विश्वकप लिग–२ को विहिबार सम्पन्न ३६ औं तथा अन्तिम खेलमा जित दर्ता गर्न सफल रहे ।

उक्त जिका लागि महत्वपूर्ण योगदान गर्ने मध्येयका खेलाडी थिए रुपन्देहीको तिलोत्तमाबाट उदाएका युवा खेलाडी कुशल भुर्तेल । उनीसँगै अन्य ३ जनाले ब्याटिङ लायनमा पूरा गरेको अर्धसतकनै जितको आधार बन्न सक्यो । उनले ओडिआई करियरमा योसँगै ५ औं अर्धसतक प्रहार गरेका हुन् । यसै बीच नेपाली क्रिकेट टिमका ओपनर ब्याट्सम्यान कुशल भुर्तेलाई तिलोत्तमा नगरपालिकाले ५० हजार सहित सम्मान गर्ने भएको छ । विहिबार युएई विरुद्धको खेलमा ५० रन बनाएका भुर्तेललाई नगरपालिकाले ५० हजार नगद सहित सम्मान गर्ने भएको हो ।
उनी तिलोत्तमा ९ निवासी दिपक भुर्तेलका छोरा हुन । भुर्तेलले विहिबार युएई सँगको एकदिवसीय प्रतियोगितामा ३५ बलमा ३ चौका र ४ छक्कासहित ५० रन पूरा गरेका थिए ।

उनले लिग अन्तरगत ओमानमा भएको सिरिजमा ६७ बलमा सिहिलो अर्धशतक पूरा गर्दै आफूलाई अब्बल क्रिकेटरको रुपमा सावित गर्न सफल भएको थिए । उक्त खेलमा उनले २ चौका र १ छक्का प्रहार गर्दै अन्तर्राष्ट्रिय सिरिजको पहिलो खेलमै अर्धशतक दर्ता गराएका थिए ।
तिलोत्तमा मणिग्रामका कुशल बुवा दीपक र आमा दुर्गाका दोस्रो सन्तान हुन् । उनका एक दिदी र एक बहिनी छन् । कुशल स्कूलदेखि नै खेलकुदप्रेमी थिए । स्कूलमा हरेक खेलमा रुचि राख्थे । खेलकुदमा हुरुक्क हुने कुशलको बानी थियो । फुटबल बढी मन पराउने उनी बुवाकै जोड बलमा क्रिकेटतर्फ लागे ।

बुवा दीपक त्यति बेला दक्षिण कोरियामा बस्थे । जब उनी सन् २०११ मा नेपाल फर्किए, एक दिन उनले छोराले क्रिकेट खेलेको देखे । तब उनलाई लाग्यो की छोरा क्रिकेटमा राम्रो गर्न सक्छ अनि उनले क्रिकेट नै रोज्न छोरालाई आग्रह गरे । त्यसपछि कुशल गाउँ ठाउँमा हुने प्रतियोगितामा नियमित सहभागी हुन थाले । खासमा बुवा दीपक पनि आफ्नो समयका क्रिकेट खेलाडी थिए । नउका बुवाले पूर्वकप्तान राजु खड्कासँगै क्रिकेट खेलेका थिए ।

आफूले पनि युवा समयमा क्रिकेट खेलेका कारण हुन सक्छ छोरालाई मैदानमा उत्रिन बुवा दिपकको हौसला सधै रहन्थ्यो । एक दिन यस्तो समय आयो, जब धनगढीमा नेपाल प्रिमियर लीग एनपीएल र कुशलको ११ कक्षाको परीक्षा एकै समयमा पर्यो । त्यस समय कुशलका बेवाले उनलाई भने ‘परीक्षा भनेको आउँदै गर्छ, तिमी एनपीएल खेल ।’ बुवा दीपक क्रिकेट मोह छोराका लागि र आफ्नो क्षेत्रको लागि भएको बताउँछन् ।
सन् २०१२ मा कुशल नेपालको यू १६ टोलीमा समावेश भए । अन्तर्राष्ट्रिय क्रिकेटमा उनको यो पहिलो पाइला थियो । सोह्र वर्षमुनिको राष्ट्रिय प्रतियोगितामा प्रभावशाली प्रदर्शन गरेपछि उनी मलेशियामा हुने एसीसी यू १६ का लागि छानिएका थिए । तर कुवेत विरुद्धको एक खेलपछि उनी अभ्यासको क्रममा घाइते भएर नेपाल फर्किनुपर्यो । चोटको फाइदा के भयो भने उनले आरामसँग एसएलसी परीक्षा दिन समय पाए ।

उनले क्रिकेटमा झन् मेहनत गर्न थाले । फलस्वरूप तीन वर्षपछि उनी यू १९ राष्ट्रिय टोलीमा पर्न सफल भए । त्यो सन् २०१५ मा मलेशियामा भएको यू १९ विश्वकप छनोट प्रतियोगिता थियो । त्यसबाट टोली विश्वकपका लागि छनोट भए । तर उनले प्रतियोगिताभरि एउटा खेल पनि खेल्ने अवसर पाएनन् । बेन्चमै बसेर मलेशियाबाट फर्किनु पर्यो ।

सन् २०१६ बाङ्ग्लादेशमा भएको यू १९ विश्वकपमा भने कुशलले न्युजिल्याण्ड विरुद्ध अविजित ३५ रनको पारी खेले । त्यो बेला कुशल ७÷८ नम्बरमा ब्याटिङ गर्थे । उक्त सिजनमा नेपाल क्वार्टर फाइनलमा बाङ्ग्लादेशसँग हारेर फर्किनु पर्यो । १६ वर्ष र १९ वर्षको राष्ट्रिय टोलीमा परेका खेलाडीको राष्ट्रिय टिमबाट खेल्नु स्वाभाविक सपना त हुने नै भयो । तर राष्ट्रिय टोलीमा प्रवेश पाउनु सहज विषय पनि थिएन । एक त नियमित घरेलु प्रतियोगिता थिएन भने राष्ट्रिय टिममा नपरेका खेलाडीका लागि त्यतिकै पनि अवसर निकै कम हुन्थ्यो ।

कुशलको हकमा राम्रो के भइदियो भने यु १६ राष्ट्रिय टोलीमा परेपछि नै उनले नेपाल पुलिस क्लबमा खेल्ने मौका पाए । यसबीचमा उनले फ्रेञ्चाइज क्रिकेटमा आफूलाई व्यस्त बनाए । उनले एभरेस्ट प्रिमियर लीग इपीएल ललितपुरबाट, पोखरा प्रिमियर लीग पोखराबाट र धनगढी प्रिमियर लीग डीपीएल विराटनगरबाट खेले । पीपीएल खेल्दा कप्तान शरद भेषावकरले उनलाई प्रारम्भिक ब्याट्सम्यानको रूपमा अगाडि ल्याएका हुन् । यसबीच राष्ट्रिय टोलीको बन्द प्रशिक्षणमा उनलाई हरेक पटक बोलाइन्थ्यो। तर अन्तिम छनोटमा उनको नाम हुँदैनथ्यो ।

सन् २०१९ को इमर्जिङ कपमा उनी बल्ल टिममा परे । तर राम्रो प्रदर्शन हुन सकेन । सोही साल नेपालमै भएको १३ औँ दक्षिण एशियाली खेलकुदमा पनि टिममा परे । तर एक खेल पनि खेल्ने मौका पाएनन् । बुवाकै हौसलामा क्रिकेटबाट पछि नहटेका उनले जब मलेशिया, नेदरल्याण्ड्ससँग त्रिकोणात्मक शृङ्खलाका् आयोजना भयो, उनका लागि त्यही समय बनेर आइदियो । राष्ट्रिय टोलीको डेब्यु प्रतियोगितामा लगातार तीन खेलमा अर्धशतकको कीर्तिमान बनाएर उनले नेपाली क्रिकेट जगत्मा आफूलाई मुख्य दाबेदारको रुपमा प्रस्तुत गर्न सके । त्यसपछि नेपाली राष्ट्रिय टोलीको खोजीको रूपमा रहेको प्रारम्भिक ब्याट्सम्यानको निर्विकल्प दाबेदारको रूपमा आफूलाई उनले उभ्याएका छन् ।

डि. बी. सुस्लिङ
लेखकको बारेमा
डि. बी. सुस्लिङ

सुस्लिङ ग्लोबल आवाज अनलाइनका समाचार संयोजक हुन् ।