सरस्वती पुजामा तिलोत्तमा–६ द्वारा विद्यालयलाई इरिक्सा

रुपन्देहीको तिलोत्तमा नगरपालिका वडा नम्बर–६ ले बसन्त पन्चमीको शुभ दिन पारी वडामा रहेको उमा आधारभुत विद्यालयलाई विद्युतीय अटो रिक्सा उपलब्ध गराएको छ ।

बिहीवार एक कार्यक्रमका बीच तिलोत्तमा नगरपालिकाका नगर प्रमुख रामकृष्ण खाण, उपप्रमुख जगेश्वरदेवी चौधरी, वडा अध्यक्ष गणेश पाठक र वडा सदस्यहरुले बिद्यालय व्यवस्थापन समितिका अध्यक्ष छत्र बहादुर दर्लामीलाई विद्युतीय अटो रिक्साको साँचो हस्तान्तरण गरेका हुन् । सुनौलो बस्ती , गोरकट्टा , कुञ्जलापुर को पश्चिम क्षेत्र टाढा टाढा बाट आउने विद्यार्थीलाई विद्यालयसम्म सहज रुपमा पुग्न विद्युतीय अटो रिक्साले सहयोग पुग्ने नगरप्रमुख रामकृष्ण खाणले बताए ।

विद्यालयको समग्र भौतिक निर्माण तथा शैक्षिक विकासका लागि आफुहरु सकारात्मक रहेको र योजना बद्ध रुपमा अगाडी बढेको नगरप्रमुख खाणले बताए । टाढाको स्थानबाट पढ्नका लागि बालबालिका आउने कार्यलाई सहज बनाउन साधनको रुपमा विद्युतीय अटो रिक्सा उपलब्ध गराइएको तिलोत्तमा वडा नम्बर–६ का अध्यक्ष गणेश पाठकले बताए । उनले सामुदायिक विद्यालयमा विद्यार्थी आकर्षण बढाउन पनि सवारी साधनले सहयोग पुग्ने जनाए ।

Advertisement