उद्यमशीलतासँग जोड्नसके कृषिले राम्रो प्रतिफल दिन्छ : कृषिमन्त्री भुसाल

मंसिर १३,

Advertisement

काठमाडौँ । नवनियुक्त कृषि विकास तथा पशुपक्षी मन्त्री घनश्याम भुसालले कृषिलाई उद्यमशीलतासँग जोड्न नसकेसम्म मुलुकको कृषि क्षेत्रले राम्रो प्रतिफल दिन नसक्ने बताएका छन्। नेपाल घरेलु तथा साना उद्योग महासंघ र विभिन्न वस्तुगत संघहरूको संयुक्त प्रतिनिधि मण्डलसँग मन्त्रालयमा आयोजित अन्तक्र्रियामा उनले त्यस्तो बताएका हुन्।

‘कृषिलाई उद्यमसँग गाँस्न सकिएन भने कृषि आफैं विकसित हुन सक्नैन, कृषिलाई विकसित गर्ने भनेको आधुनिकीकरण, यान्त्रीकरण,व्यवसायीकरण जे भने पनि मेरो प्रयत्न कृषिलाई उद्यमसँग गाँस्ने नै हो,’ उनले भने। कृषिलाई उद्यमशीलतासँग जोड्ने सोंच बनाएर मन्त्रालयको जिम्मेवारीमा आएको बताए। महासंघका अध्यक्ष श्यामप्रसाद गिरीले मुलुकमा सञ्चालित लघु, घरेलु तथा साना उद्योग स्थानीयस्तरमा कृषि र यसको उत्पादनसँग जोडिएको भन्दै यस्ता उद्योगी र गाउँघरमा कृषि कर्म गर्ने किसानको हितमा राज्यको नीति केन्द्रित हुनुपर्नेमा जोड दिए।

कृषि व्यवसाय र कृषि उद्यमशीलताको कुरा गर्दा धेरैजसो कृषिका आयोजना सहरमा बस्नेहरूले खोलेका फर्महरूलाई अनुदान दिनेतर्फमात्रै केन्द्रित रहेको रहेको मन्त्री भुसालको भनाइ छ।
महासंघको संयुक्त प्रतिनिधि मण्डलले संघीय मामिला तथा सामान्य प्रशासन मन्त्री हृदयेश त्रिपाठीलाई उनकै कार्यकक्षमा भेटी बधाई तथा शुभकामना दिएको थियो।

उक्त अवसरमा संघीय मामिला मन्त्री त्रिपाठीले खासगरी स्थानीय रोजगार र स्वरोजगारका निम्ति स्थानीय उद्यमशीलता र पालिका र प्रदेश तहमा उद्योगग्राम स्थापनाका लागि पालिका र प्रदेश सरकारसँगको सहकार्य र महासंघसँगको समन्वयमा अघि बढ्ने बताएका थिए।- नेपालन्युज