प्रदेश ५ का ६ जिल्लामा ९ पदका लागि ४१ उम्मेदवार

मंसिर १२,
सुमन केसी/ग्लोबल आवाज

दाङ । प्रदेश ५ मा रिक्त रहेको एक प्रदेश सभा सदस्यसहित ९ वटा पदका लागि ४१ जनाले उपनिर्वाचनमा भाग लिदैछन् । यहि मंसिर १४ गते हुने उपनिर्वाचनका लागि प्रदेशसभा सदस्य र स्थानीय तह अन्तर्गत विभिन्न पालिकाको ८ वटा वडा अध्यक्ष पदको लागि ४१ जना उम्मेदवार रहेका छन् । दाङ, रोल्पा, बाँके, प्युठान, गुल्मी र अर्घाखाँची गरि प्रदेशका ६ जिल्लामा रिक्त रहेका पदमा उपनिर्वाचन हुँदैछ ।

सम्वन्धित जिल्ला निर्वाचन कार्यालयले दिएको तथ्याङक अनुसार राजनीतिक दल र स्वतन्त्रको तर्फबाट उम्मेदवार बनेका छन् । जस अन्र्तगत दाङ निर्वाचन क्षेत्र नम्बर ३ (ख) मा प्रदेश सभा सदस्य पदका लागि १२ राजनीतिक दल र दुई जना स्वतन्त्र गरी १४ जना उम्मेदवार रहेका छन् । स्वर्गिय सांसद उत्तरकुमार वलीको सवारी दुर्घटनामा परि निधन भएपछि उक्त पदका लागि उपनिर्वाचन हुन लागेको हो । उनी तत्कालिन नेकपा एमालेबाट प्रदेश सभा सदस्यमा निर्वाचित भएका थिए । यस्तै जिल्ला निर्वाचन कार्यालय घोराहीका अनुसार घोराही उपमहानगरपालिका वडा नम्वर १६ मा वडा अध्यक्ष लक्षिनप्रसाद बुढाको निधन भएपछि रिक्त रहेको पदमा पाँच राजनीतिक दल र दुई जना स्वतन्त्र गरि सात जना उम्मेदवार रहेका छन् । उनी २०७४ सालको स्थानीय तहको निर्वाचनमा तत्कालिन नेकपा एमालेबाट निर्वाचित भएका थिए । दुई स्थानमा हुने उपनिर्वाचनमा ७३ हजार एक सय ७२ मतदाता रहेका छन् । जसमा दाङ निर्वाचन क्षेत्र नम्बर ३ (ख)मा ६८ हजार सात सय १९ र घोराही १६ मा चार हजार ४ सय ५४ जना मतदाता रहेका छन् ।

यस्तै रोल्पाको थवाङ गाउँपालिका वडा नम्वर १ का वडा अध्यक्ष फर्कबहादुर बुढाको निधन भएको छ । उनको निधनपछि रिक्त रहेको पदका लागि दुईजना उम्मेदवार रहेको जिल्ला निर्वाचन कार्यालय रोल्पाले जनाएको छ । नेपाल कम्युनिष्ट पार्टी (नेकपा) र नेपाली कांग्रेस बिच प्रतिस्प्रर्धा हुँदैछ । स्वतन्त्रको तर्फबाट एक जनाले मनोनयन दर्ता गराए पनि उनले उम्मेद्वारी फिर्ता लिईसकेको कार्याले बताएको छ । उक्त वडामा एक हजार तीन सय मतदाता रहेको जनाइएको छ । यस्तैगरी प्युठान जिल्लाको दुई पालिकामा उपनिर्वाचन हुन लागेको छ । जिल्ला निर्वाचन कार्यालय प्युठानले दिएको जानकारी अनुसार प्युठान नगरपालिका वडा नम्वर २ का खिमबहादुर विष्टको निधन भएपछि रिक्त रहेको पदमा दुई जना उम्मेद्वार रहेका छन् । उनले तत्कालिन नेकपा एमालेबाट चुनाव जितेका थिए । अहिले नेकपा र नेपाली कांग्रेस विच प्रतिस्प्रर्धा हुन लागेको छ ।

सोहि जिल्लाको ऐरावती गाउँपालिका वडा नम्वर १ र २ का वडा अध्यक्षहरु जिल्ला समन्वय समितिको प्रमुख र उपप्रमुख भएपछि दुवै वडा अध्यक्ष पद रिक्त रहेको जिल्ला निर्वाचन कार्यालय प्युठानले जानकारी दिएको छ । वडा नम्वर १ मा अध्यक्ष पदम थापा २०७४ सलाको स्थानीय निर्वाचनमा तत्कालिन माओवादी केन्द्रबाट निर्वाचित भएका थिए । उनी अहिले जिल्ला समन्वय समिति प्युठानको उपप्रमुख बनेको कार्यालयले बताएको छ । कार्यालयका अनुसार वडा नम्वर दुईका वडा अध्यक्ष केशवराज आचार्य जिल्ला समन्वय समिति प्युठानको प्रमुख बनेका छन् । वडा नम्वर १ मा नेकपा र कांग्रेस गरी दुई जना उम्मेदवार छन् भने वडा नम्वर २ मा कांग्रेस, जनमोर्चा र राप्रपा गरी तिन जना उम्मेदवार चुनावी मैदानमा उत्रिएका छन् ।

बाँकेमा पनि उपनिर्वाचन हुन लागेको छ । जिल्लाको कोहलपुर नगरपालिका वडा नम्वर ६ का वडा अध्यक्ष राम सोहन थारुको निधनपछि रिक्त रहेको पदका लागि पाँचजना उम्मेदवार रहेको जिल्ला निर्वाचन कार्यालय बाँकेले जानकारी दिएको छ । उनी कांग्रेसबाट निर्वाचित भएका थिए । सो वडामा २ हजार २६ जना मतदाता रहेका छन् । गुल्मी रुरुक्षेत्र गाउँपालिका वडा नम्वर ६ मा अध्यक्ष पुर्ण रिगामीको निधनपछि उक्त पदका तिनजना उम्मेदवार चुनावी मैदानमा उत्रिएका छन् । उनी तत्कालिन एमालेबाट निर्वाचित भएका थिए । जिल्ला निर्वाचन कार्यालय गुल्मीका अनुसार नेकपा, कांग्रेस र स्वतन्त्रको तर्फबाट उम्मेदवार बनेका छन् । उक्त वडामा दुई हजार ४८ मतदाता रहेका छन् ।

यस्तैगरी अर्घाखाँची जिल्लाको मालारानी गाउँपालिका वडा नम्वर ३ को वडा अध्यक्ष जिवन चौहानको सवारी दुर्घटनाका कारण निधन भएपछि अहिले त्यहाँ पनि उपनिर्वाचन हुन लागेको छ । जिल्ला निर्वाचन कार्यालय अर्घाखाँचीका अनुसार रिक्त रहेको पदमा तिन जना उम्मेदवार रहेका छन् । नेकपा, कांग्रेस र राप्रपाले उम्मेदवारी दिएका छन् । वडामा तिन हजार ११ जना मतदाता रहेका छन् ।