जन प्राथमिक विद्यालयमा सामुदायिक प्रहरी कार्यक्रम

मंसिर १०,

ग्लोबल आवाज

पाल्पा । पाल्पाको तिनाउ गाउँपालिका वडा नं. १ कचल ओखलढुंगामा रहेको जन प्राथमिक विद्यालयमा सामुदायिक प्रहरी कार्यक्रम सम्पन्न भएको छ । समुदाय र प्रहरीबीचको साझेदारीमा समुदायमा रहेका बिभिन्न किसिमका समस्या समाधान गर्नका लागि यो कार्यक्रम गरिएको हो ।

कार्यक्रमको अबसरमा जन प्राथमिक विद्यालयका ८१ जना गरिब तथा जेहेन्दार विद्यार्थीलाई कापी,कलम, किताव र स्टेशनरी सामग्री सहयोग गरिएको थियो । जिल्ला प्रहरी कार्यालय पाल्पाका प्रमुख दिपेन्द्र जिसीको नेतृत्वमा गएको प्रहरी टोलीले उक्त सहयोग हस्तान्तरण गरेको हो । प्रहरी प्रमुख जिसीले प्रहरी जनताको सेवक भएकाले जनता र प्रहरीको आत्मियता बढाउँन जनतासँग प्रहरी कार्यक्रम संचालन गर्दै आइरहेको बताए । तिनाउ गाउँपालिकाका अध्यक्ष ओमबहादुर घर्तिले समुदाय प्रहरी साझेदारी कार्यक्रम मार्फत गाउँमा शान्ति सुरक्षा र सहयोगमा प्रहरीको महत्वपूर्ण भूमिका रहेको बताउँदै दोभान प्रहरी चौकीले गाउँपालिकासँगको समन्वयमा विभिन्न कार्यक्रम गर्दै आएको भन्दै धन्वाद दिएका थिए ।

कार्यक्रममा तिनाउ गाउँपालिकाका प्रवक्ता एवं वडा नं. २ का अध्यक्ष राजेश श्रेष्ठ, वडा नं. १ का अध्यक्ष रोमबहादुर लम्तरी, दोभान चौकीका इन्चार्ज बालबहादुर घर्ती लगाएतले भनाई राखेका थिए । विद्यालयका अध्यक्ष टेकबहादुर पुनको अध्यक्षता प्रधानाध्यापक भीमबहादुर पुनले स्वागतको स्वागतमा भएको कार्यक्रमको सञ्चालन भने सामुदायिक प्रहरी सेवा केन्द्रका सदस्य रमेश बोहोराले गरेका थिए ।