भैरहवा । राष्ट्रिय स्तरमा ख्याति प्राप्त स्थानीय गायक हेमन्त शर्माको आउने शुक्रबार भैरहवाको गोदावरी प्लाजामा “हेमन्त साँझ” हुने भएको छ । बुधबार पत्रकार सम्मेलनको आयोजना गरि कार्यक्रमबारे जानकारी गराईएको छ । कोभिडको कारण शिथिल परेको बजारलाई चलायमान बनाउन आवश्यक रहेको बताउदै बजार चलायमान बनाउन कार्यक्रमको आयोजना गरिएको आयोजकले बताएका छन् ।

अहिले परिवारको साथ पारिवारिक वातावरणमा “गुड फ्राईडे” मनाउने गरि कार्यक्रमबो आयोजना गरिएको छ । फागुन २८ गते शुक्रबार कार्यक्रम हुने आयोजक हरि प्रसाद आचार्यले बताए । सांझ ५ बजेदेखि सुरु हुने कार्यक्रममा सहभागि हुन प्रवेश शुल्क वापत १ हजार ५ सय रुपैया र एकजोडी अथवा दुई जनालाई २ हजार ५ सय रुपैया लाग्ने आचार्यले जानकारी दिए । सांगितिक कार्यक्रममा सहभागि हुने दर्शकलाई खानाको समेत व्यवस्था गरिएको उनले बताए । कार्यक्रममा करिब १ सय ५० जोडीलाई सहभागिता गराउने लक्ष्य रहेको गोदावरी प्लाजाले जनाएको छ ।

करिब ८ बर्षको खाडी मुलुकको बसाई पछि स्वदेशमै केही गर्नु पर्छ भन्ने उद्देश्यले स्थानिय अभिजित भुषाल र अभिषेक भुषालले गोदावारी प्लाजा सञ्चालनमा ल्याएका छन् । १ करोड २७ लाख लगानीमा ५ कठ्ठा ५ धुर क्षेत्रफलमा सञ्चालित उक्त होटलमा ६ जनाले रोजगारी पाएका छन् । प्लाजाले आगामी दिनमा बस्ने सुविधासहित ६–७ वटा कोठाहरुका साथै कटेज पनि निर्माण गर्ने लक्ष्य राखेको छ ।