भैरहवा । कोभिड महामारी बीच भैरहवादेखि काठमाण्डौसम्मको लागि अत्याधुनिक बस सेवा सञ्चालनमा आएको छ । सिद्धार्थ सार्वजनिक यातायात प्रालीले बिहिबारदेखी ४ वटा अत्याधुनिक बस सुरु गरेको जनाएको छ ।

कोभिडबाट हुने जोखिमलाई ध्यानमा राख्दै यसबाट जोगिन बसमै फेस सिल्ड, सेनिटाइजर, मास्क र पञ्जा प्रदान गरिने छ । यति मात्र हैन बसमा रहेको सिटको बनावट पनि सामाजिक दुरी ख्याल गरि बनाइएको सिद्धार्थ सार्वजनिक यातायात प्रालिका अध्यक्ष सञ्जिव रोक्काले बताए । उनले बस ४० सिट क्षमताको रहे पनि ३० वटा मात्र सिट जडान गरिएको बताए । सोफाको आभास दिलाउने सिटले सेवाग्राहीको यात्रा थप सहज र सुरक्षित बनाउने रोक्काको भनाई छ ।

पूर्णतया वातानुकुलित रहेको बसमा मोबाइल होल्डर, मोबाइल चार्जर, पंखा, बत्तीको सुविधा रहेको छ । काठमाण्डौंसम्मको लागि प्रति यात्रु १ हजार भाडा तोकिएको छ । यसमा यात्रुलाई सुरक्षा सामाग्रीको साथै नास्ता र पानी बसमै उपलब्ध गराईने प्रालीका अध्यक्ष रोक्काले जानकारी दिए । बिहिबार सुरु हुने बस सेवाको सुरुवात लुम्बिनी प्रेस क्लबका अध्यक्ष दिपेश पछाई र सिद्धार्थ सार्वजनिक यातायात प्रालीका अध्यक्ष सञ्जिव रोक्काले संयुक्त रुपमा रिबन काटेर गरेका थिए ।