भोकालाई खाना पकाउँदै भैरहवाका युवाहरु

भैरहवा । लकडाउनको बेला खाना समस्या परेकाहरुकोलागि भैरहवाका युवाहरुले खाना पकाएर खुवाउन थालेका छन् । अमर ज्योति युवा क्लब भैरहवा सम्बद्ध युवाहरुले यस्तो कार्यको थालनी गरेका हुन् । क्लबले बिहानको एक छाक नेपाली शुद्ध खाना खुवाउनेगरी तयारी थालेको अध्यक्ष प्रभात गुरुङले बताए । उनल भने, ‘हामीले पहिलो चरणमा अस्पतालहरुमा रहेका विरामी कुरुवालाई खुवाउछौं । आज युसीएमएस भैरहवामा उपचाररत विरामीका कुरुवालाई खुवाउछौं । अस्पतालले दिएको सूचना अनुसार पांचसयजनालाई आज खाना खुवाउने कार्यक्रम रहेको छ। ’

उक्त अस्पतालमा पहाडी जिल्लाहरु गुल्मी, अर्घाखाची, प्यूठान, रोल्पा, रुकुम र तराईका जिल्लाहरुका कपिलवस्तु, नवलपरासी पश्चिम र रुपन्देहीका विभिन्न क्षेत्रबाट दैनिक ५ सय भन्दा बढी उपचारकोलागि आउने गर्दछन् । अस्पताल बाहिरका होटलहरु लकडाउनको कारण पुरै बन्द छन् । अस्पतालको क्यान्टीनले सबैलाई खाना पुराउन सकेको अवस्था छैन ।

क्लब सम्बद्ध युवाहरुले दिनरात सुरक्षामा खटिएका प्रहरी र सशस्त्र प्रहरीका जवानहरुलाई पनि खाजा सामग्री उपलब्ध गराउने तयारी गरेको क्लबका कोषाध्यक्ष रेमसेन ठकुरीले बताए । एकाबिहानै युवाहरु सक्रियतापुर्वक लकडाउनको कारण समस्या परेकाहरुकोलागि आफै खाना पकाउन तम्सीएको देख्दा आफुहरुलाई कोरोना विरुद्धको अभियानमा झनै सक्रियतापुर्वक लाग्न प्रेरणा मिलेको युवाहरुसँगै खाना पकाउने ठाउमा भेटिनुभएका सिनपा १३ का वडाध्यक्ष सतिस मर्रासिनीले बताए ।

लकडाउनको समय फुर्सदको उपयोग गर्दै धेरै युवाहरु यतिबेला तास खेल्ने, यता उता हिडडुल गर्ने त कतिपय साथिभाइसँग गफिदै त कतिपय घरमै परिवारसँग समय बिताउने गरेका छन् । तर भैरहवाको अमर ज्योति युवा क्लबसम्बद्ध युवाहरु भोकाहरुकोलागि खाना बनाउने र खुवाउने काममा सक्रिय भएका छन् । बिक्रम सम्बत २०२४ सालमा प्राज्ञ बुंद रानाको अध्यक्षतामा खेलकुद र सास्कृतिक क्षेत्रमा काम गर्ने उद्देश्यले स्थापना भएको अमर ज्योति युवा क्लबले गरेको मानविय कार्य सिंगो समाजकोलागि अनुकरणीय भएको सिनपा १२ का वडा सदस्य कुमार गुरुंगले बताए ।

बिहानै झिसमिसेमा खुल्ला आकाशमुनि खाना पकाउन सक्रिय युवाहरुको समूह मंगलबार ५ सयजनाकोलागि खाना तयारी गर्दै थिए । उनीहरुको तालिका अनुसार मंगलबार अस्पतालमा रहेका विरामीका कुरुवालाइ खाना खुवाउने कार्यक्रम तय भएको छ ।