बुटवल । गुल्मीको हुँगाका अशोक पौडेलले नेपाली क्रिकेट क्षेत्रमा एक उदयमान खेलाडीको पहिचान बनाउन सफल भएका छन् । सानो उमेरदेखि क्रिकेट खेल हेर्न र खेल्न मन पराउने अशोक अहिले आफ्नै मेहनत र परिवारको साथले अन्डर–१९ राष्ट्रिय क्रिकेट टिमको बन्द प्रशिक्षणमा परेका छन् ।

गुल्मीको छत्रकोट गाउँपालिका वडा नम्बर १ हुँगामा जन्मिएका पौडेल अहिले अन्डर–१९ राष्ट्रिय क्रिकेट टिमको क्लोज क्याम्पमा परेका हुन । बुवा शोभाखर पौडेल र आमा तुल्सा पौडेलको कोखबाट जन्मिएका अशोकको बाल्यकाल गुल्मीमै वित्यो । कक्षा १ देखि ३ सम्म गुल्मीमै पढेका उनले कक्षा ४ र ५ भने बुटवलमा रहेको ह्वाईड बोडिङ स्कुलमा पढे । त्यसपछि अध्यायनका लागि उनी काठमाडौं पुगे । क्रिकेट खेलप्रति उनको रुची भएपनि गाउँमा त्यत्ति सहज भएन । उनी अध्यायनकै लागि काठमाडौंमा पुग्दा १२ वर्षको उमेरमा क्रिकेट खेल्न सुरु गरे ।

काठमाडौंमा रहेको ग्रेड हिमालय क्रिकेट एकेडेमीबाट प्रशिक्षण लिएपछि औपचारिक क्रिकेट खेल्न थालेका पौडेल अथक मेहनत र परिश्रमबाट अन्डर–१९ राष्ट्रिय क्रिकेट टिमको बन्द प्रशिक्षणमा परेका हुन । बन्द प्रशिक्षणमा पर्नु अघि उनले प्रदेश स्तरीय क्रिकेट खेल समेत खेलेका थिए ।अन्डर–१९ प्रदेश स्तरीय क्रिकेट प्रतियोगितामा ३ वर्षसम्म बाग्मती प्रदेशबाट खेलेका अशोक बुवा र आमाको प्रेरणाले नै क्रिकेटमा रुची बढ्दै गएको बताउँछन् ।

अन्डर–१९ मा पहिले छनोट भए पनि ईन्जुरीका कारण खेल्न नपाएका अशोकले पछि प्रधानमन्त्री कप क्रिकेट खेले । नुवाकोटबाट पिएम कप खेलका अशोकले काठमाडौं विरुद्ध ६० रन बनाएका थिए । त्यसपछि फेरी ईन्जुरी भयो । ‘खेल्ने क्रममा ईन्जुरी भएपछि डाक्टरले ४० दिन आराम गर्न सल्लाह दिनुभएको थियो । तर २० दिनपछि अन्डर–१९ को गेम भएकोले २० दिनमै खेल खेले बाग्मतीबाट । त्यो बेला कर्णालीलाई ५८ रन हानेको थिए’ उनले भने ।

उनले अहिले बन्द प्रशिक्षणमा भए पनि आफू अन्डर–१९ राष्ट्रिय टिममा पर्ने आशा गरेको बताए । उनले आफूले क्रिकेट खेल्ने मौका पाए देशका लागि क्रिकेट खेल्ने बताए ।