लुम्बिनीमा ३ वर्षमा सवारी दुर्घटनामा १ हजार ५३६ जनाको मृत्यु, रुपन्देहीमा मात्रै २६९

बुटवल । लुम्बिनी प्रदेशमा पछिल्लो ३ वर्षमा सवारी दुर्घटना परी एक हजार ५३६ जनाको मृत्यु भएको छ भने ३ हजार ५ जना गम्भीर घाइते भएका छन् । प्रदेशमाका १२ वटा जिल्लामा तीन वर्षको तीन हजार २६७ सवारी दुर्घटना भएको राजमार्ग सुरक्षा तथा ट्राफिक व्यवस्थापन कार्यालय बुटवलले जनाएको छ ।

आर्थिक वर्ष ०७७/७८ मा १ हजार २११ सवारी दुर्घटनामा परी ५२३ जनाको मृत्यु भएको छ । सोही वर्ष १०८३ गम्भीर घाइते भएका थिए भने साधारण घाइते ७४० जना भएको प्रहरीको तथ्याङ्क छ ।

त्यस्तै, आर्थिक वर्ष ०७८/७९ मा ११६४ सवारी दुर्घटना भएका थिए, त्यसमा ५५१ जनाको मृत्यु जनाको मृत्यु भएको थियो । १ हजार १२३ जना गम्भीर घाइते भएकोमा साधारण घाइते ५९७ जना थिए ।

पछिल्लो आर्थिक वर्ष ०७९/८० मा दुई आर्थिक वर्षको भन्दा सवारी दुर्घटनाको संख्या घटेको देखिन्छ । उक्त आर्थिक वर्षमा ८९२ सवारी दुर्घटना हुँदा ४६२ जनाको मृत्यु भएको छ । दुर्घटनामा ७९९ जना गम्भीर घाइते र ४७७ जना सामान्य घाइते भएका छन्

पहरीको तथ्याङ्क अनुसार पछिल्ला आर्थिक वर्षमा सवारी दुर्घटनाबाट मृत्यु हुनेको संख्यामा केही कमि आएको छ । पछिल्ला वर्ष सवारीबाट दुर्घटना घट्नुमा विभिन्न कारणमध्ये प्रहरीको सचेतना र कारवाही पनि प्रमुख कारण रहेको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, बुटवलका प्रवक्ता डीएसपी होम थापाले बताए ।

कुन जिल्ला कतिले गुमाए ज्यान?
लुम्बिनी प्रदेशका १२ जिल्ला मध्य सबै भन्दा धेरै रुपन्देहीमा सवारी दुर्घटनामा परी मृत्यु भएको छ । राजमार्ग सुरक्षा तथा ट्राफिक व्यवस्थापन कार्यालय बुटवलका अनुसार पछिल्लो ३ वर्षको अवधिमा रुपन्देहीमा २६९ जनाको सवारी दुर्घटनाबाट मृत्यु भएको छ । यहाँ आर्थिक वर्ष २०७७/७८ मा १२९, २०७८/७९ मा ३१ जना, २०७९/८० मा १९० जना गरी २६९ जानको मृत्यु भएको छ ।

यस्तै नवलपरासी पश्च्मिमा पछिल्लो ३ वर्षमा १२८ जना, कपिलवस्तुमा १७९ जना, पाल्पामा ११० जना, गुल्मीमा ९४, अर्घाखाँचीमा ६७, दाङमा १७५ जनाले ज्यान गुमाएका छन् । यस्तै बाँकेमा १८९, बर्दियामा ११२, प्यूठानमा १०३, रोल्पामा ८० र रुकुम पश्च्मिमा ४३ जनाले ज्यान गुमाएको राजमार्ग सुरक्षा तथा ट्राफिक व्यवस्थापन कार्यालय बुटवलका प्रवक्ता डीएसपी होम थापाले बताए।

साढे ७ लाख सवारी कारवाहीमा
लुम्बिनी प्रदेशमा पछिल्लो ३ वर्षमा मात्रै ट्राफिक नियम उल्लघंन गर्ने साढे ७ लाख सवारी कारवाहीमा परेका छन् । राजमार्ग सुरक्षा तथा ट्राफिक व्यवस्थापन कार्यालय, बुटवलका प्रवक्ता थापाका अनुसार पछिल्लो ३ वर्षमा ट्राफिक नियम उल्घंन गर्ने ७ लाख ५२ हजार १७१ सवारीलाई कारवाही परेका हुन् ।

आर्थिक वर्ष २०७७/७८ मा १ लाख ७० हजार ९२७, २०७८/७९ मा २ लाख ८४ हजार ८९९ र २०७९/८० मा २ लाख ९६ हजार ३४५ सवारी कारवाहीमा परेको उनले बताए । यस्तै तीन वर्षमा ट्राफिक नियम विपरीत सवारी चलाउनेलाई कारवाही गरी ४३ करोड २१ हजार राजस्व सङ्कलन भएको प्रवक्ता थापाले बताए ।

आर्थिक वर्ष ०७७/७८ मा दश करोड ६१ लाख ८ हजार ५ सय, ०७८÷७९ मा २०करोड ८९लाख ५ हजार र २०७९/८० मा २१ करोड ७१ लाख ७४ हजार पाँच सय राजश्व सङ्कलन गरिएको उनले बताए ।