अख्तियारमा शिक्षा सम्बन्धि उजुरीका चाङ

पुस २५,

Advertisement

सुमन केसी/ग्लोबल आवाज

दाङ । अख्तियार दुरुपयोग अनुसन्धान आयोगमा दाङका शिक्षा सम्वन्धि धेरै उजुरीहरु परेका छन् । आयोगको कार्यालय बुटवल सम्पर्क कार्यालय नेपालगन्जमा दाङका शिक्षा सम्वन्धि २ दर्जन बढि उजुरी परेका छन् । दाङका १० वटा स्थानीय तह मध्ये २ उपमहानगरपालिका सहित ५ वटा स्थानीय तहका शिक्षा सम्वन्धि २६ वटा उजुरी परेको कार्यालयका सुचना अधिकारी लोकमणि पाण्डेले जानकारी दिए ।

यो तथ्याङ्क चालु आर्थिक वर्षको पौष २३ गते सम्मको हो । सम्वन्धित स्थानीय तहको शिक्षामा भ्रष्टाचार र अनुचित कार्य गरेको भन्दै अख्तियारको कार्यालयमा उजुरी परेको सुचना अधिकारी पाण्डेले बताएका छन् । विशेष गरी शिक्षामा आर्थिक अनियमितता गरेको सम्वन्धि उजुरी परेको छ । त्यस्तैगरी शिक्षा सम्बन्धि अनुचित कार्य अन्तर्गत शिक्षक दरबन्दी मिलान, निजि शिक्षकलाई राहत दरबन्दीमा बढुवा जस्ता कार्य पर्दछन् । तर पछिल्लो समय २०७२ को सविधानले शिक्षामा अनुचित कार्यको नियमन अख्तियार आयोगले गर्न नपाउने व्यवस्था गरेपनि कार्यालयले अहिलेसम्म हेर्दै आएको उनले बताएका छन् । उनका अनुसार सवैभन्दा धेरै घोराही उपमहानगरपालिकाका उजुरीहरु रहेका छन् । घोराही उपमहानगरको शिक्षा सम्वन्धी अख्तियारमा ११ वटा उजुरी परेको छ ।

त्यस्तैगरी दोस्रोमा तुलसीपुर उपमहानगरपालिका परेको छ । तुलसीपुरमा शिक्षा क्षेत्रमा अनियमितता भएको भन्दै ६ वटा उजुरी परेको छ ।त्यसैगरी लमही नगरपालिकाका १, राजपुर गाउँपालिकाका ३, शान्तीनगर गाउँपालिकाका २ र बबई गाउँपालिकाको ३ वटा उजुरी परेको सुचना अधिकारी पाण्डेले जानकारी दिए । यस अवधिमा बंगलाचुली, दंगीशरण, गढवा र राप्ती गाउँपालिकाका शिक्षा क्षेत्रमा कुनै उजुरी परेको छैन । यद्यपी गत वर्षको तुलनामा यस वर्ष उजुरीको संख्यामा बृद्धि भएको अख्तियार कार्यालयले बताएको छ । कार्यालयका अनुसार गत वर्ष २२ वटा उजुरी परेको थियो । उजुरी परेपनि त्यसको वास्तविकताको अध्ययन अनुसन्धान गरेर मात्रै भ्रष्टाचार या अनियमितता भएको हो या होइन भन्ने वारेमा भन्न सकिने पनि उनले बताए ।