लक्की अली पोखरामा, भोलि ‘क्याटवाक’ मा शो

पोखरा । अभिनेता एवं गायक अलीले पहिलो पटक पोखराको बिग क्लब ‘क्याटवाक’मा प्रत्यक्ष सांगीतिक प्रस्तुतिको लागि पोखरा आएका छन् ।बुधबार राजधानीमा रहेको एलओडीपछि शुक्रबार भारतीय पपस्टार लक्की अलीको पोखरामा लाइभ कन्सर्ट हुने भएको छ ।

‘ना तुम जानो ना हम’, ‘गोरी तेरे आँखे’ जस्ता हिट नम्बर दिएका अभिनेता एवं गायक अलीले क्याटवाकमा लाइभ कन्सर्ट गर्ने निश्चित भएको र टिकट बिक्री भइरहेको क्याटवाकका संचालक गुप्त लामाले जानकारी दिए । अलीलाई पोखरा ल्याउने काम भने डिजे फिन्जोकले गरेका हुन् ।

गत भदौ २ गते खहरेचोकमा स्थापना भएको क्याटवाकमा अलीलाई प्रत्यक्ष सुन्न, हेर्न पहिलो चरणको टिकट मूल्य १५ सयदेखि २ हजार रुपैयाँ राखिएको छ । त्यसपछिको टिकट मूल्य २५ सयदेखि ३ हजार रुपैयाँसम्म पुग्नेछ।

अनुमानित ३० करोड रुपैयाँ बढी लगानीमा खोलिएको क्याटवाकले एकैपटक २ हजार बढीलाई रेस्टुरेन्ट र फ्लोरमा सेवा दिन सक्नेछ ।क्याटवाकको डान्स फ्लोर, म्युजिक सिस्टम र सुरक्षा प्रणाली अन्तर्राष्ट्रियस्तरको रहेको संचालक लामाले जानकारी दिए ।