काठमाडौं । कोरोना संक्रमण निको भएकाहरूमा पनि पोष्ट कोभिड (कोभिड निको भए पछि हुन समस्या)को जोखिम बढीरहेको चिकित्सकहरूले बताएका छन् । कोरोना संक्रमण निको हुँदै जाँदा पोष्ट कोभिडका बिरामीहरूको संख्या पनि बढ्दै गएको उनीहरूले बताएका हुन् ।

ह्याम्स अस्पतालका छाती रोग विशेषज्ञ डा. राजु पंगेनीले कोरोना संक्रमितहरुले चाँडै उपचारमा ध्यान नदिँदा पोष्ट कोभिडका बिरामीको संख्यामा वृद्धि हुने गरेको बताए । ह्याम्समा उपचार पछि निको भएका ५० प्रतिशत मानिसहरु पोष्ट कोभिडको समस्या लिएर आउने गरेको उनले बताए । कोरोना संक्रमितहरुको उपचारमा ढिलाई हुँदा पोष्ट कोभिडका लक्षणहरू बढी देखिएको उनको भनाई छ । पोष्ट कोभिड देखिएका अधिकांशमा खुट्टा दुख्ने, श्वासप्रश्वासमा समस्या हुने, मुटु हल्लिएको अनुभूति हुने, शरीरमा शक्ति नै नभएको महसुस हुने खालका लक्षण देखिने गरेको उनी बताउँछन् ।

कोरोना संक्रमण भएकाहरूमा अक्सिजनको मात्रा कम भएर अस्पताल पुगेकाहरूमा पोष्ट कोभिडको लक्षण बढी देखिएको उनले बताए । पोष्ट कोभिडको लक्षणहरू हराउनको लागि सामान्यतया चार महिना लाग्न सक्ने तर मनोवैज्ञानिक रूपमा यस्ता लक्षणहरू हराउनको लागि छ महिनासम्म लाग्न सक्ने उनी बताउँछन् ।

यस्तै त्रिवि शिक्षण अस्पतालका उपनिर्देशक डा. सन्तकुमार दास पनि कोभिड निको भएकाहरूमा पोष्ट कोभिडको जोखिम बढेको स्वीकार्छन् । कोरोना संक्रमण भएर निको भएका बिरामीमा पोष्ट कोभिडको जोखिम उच्च रहेको उनको भनाई छ । आईसियूमा उपचार गरेर निको भएका कोभिडका बिरामीमा पोष्ट कोभिडका लक्षणहरू धेरै देखिने गरेको उनले बताए । पुरुषको तुलनामा महिलामा पोष्ट कोभिडको जोखिम बढी देखिने गरेको उनी बताउँछन् ।

यस्तै शुक्रराज ट्रपिकल तथा सरुवा रोग अस्पताल टेकुका निर्देशक डा. अनुप बास्तोलाले पनि कोरोना संक्रमित निको भएपछि पोष्ट कोभिडका लक्षणहरू देखिएको बताएका छन् । पोष्ट कोभिड भएका बिरामीहरूमा मनोपरामर्शको एकदमै आवश्यकता रहेको उनले बताए । “विशेषगरी पोष्ट कोभिडका लक्षणहरू आईसीयूमा पुगेर रिकभर भएका बिरामीहरूमा धेरै देखिएको छ । उनीहरूले अन्य मानिसको ज्यान गएको देख्दा आफूलाई पनि यस्तै हुन्छ की भन्ने मनोभाव राखेको पाइएकाले कोभिड निको हुनेहरूलाई मनोपरामर्शको आवश्यकता देखिएको छ”, उनले भने । पोष्ट कोभिडका लक्षहरू युवा नै धेरै देखिने गरेको उनी बताउँछन् । -विष्णु पाण्डेय/गोरखापत्र अनलाइन