भैरहवा । विगत तीन बर्षदेखि रिक्त रहेको नेपाल कृषि अनुसन्धान परिषद (नार्क) को कार्यकारी निर्देशकमा भैरहवाका दीपक भण्डारी नियुक्त भएका छन् । कृषी तथा पशुपंक्षि विकास मन्त्रालयको सिफारिशमा मन्त्रिपरिषद्को बैठकले भण्डारीलाई नियुक्त गरेको हो । अन्नबालीको आधुनिक जातको विकास गर्ने अनुसन्धान केन्द्रको रुपमा रहेको नार्कको कार्यकारी निर्देशकको पद विगत तीन बर्ष देखि रिक्त रहेको थियो ।

२०४७ सालमा लोकसेवा आयोग मार्फत बालि संरक्षण अधिकृत नियुक्त भएका भन्डारी २०४७ देखि ०५० सम्म जिल्ला कृषी विकास कार्यलय कपिलवस्तु र दांगमा कार्यरत थिए । यसैगरी २०५० देखि कृषी अनुसन्धान परिषदमा काम गर्न थालेका उनी २०६० सालमा वरीष्ठ वैज्ञानिक भएका थिए । ०७२ सालमा मुख्य बैज्ञानिकको जिम्मेवारी प्राप्त गरेका उनले २०७६ पुस देखि कामु कार्यकारी निर्देशकको जिम्मेवारी प्राप्त गरेका थिए ।

जागिरको सिलसिलामा २०५२ देखि राष्ट्रिय गहुंबालि अनुसन्धान कार्यक्रम भैरहवामा १७ वर्ष काम गर्ने सिलसिलामा उनले गहुंका रोगहरुको नियन्त्रणमा उत्कृष्ट कार्य गरेबापत बोर्लग ग्लोबल रस्ट इनिसियटिभको अन्तराष्ट्रिय बिजिआरआइ जेनि स्टेवार्डसीप अवाड समेत प्राप्त गरेका थिए । भन्डारीले अनुसन्धानको क्षेत्रमा महत्वपुर्ण भूमिका खेलेको हुदा नार्कबाटै २ लाख राशिको पुरस्कार पनि प्राप्त गरेका छन् । भन्डारीको हाल सम्म ७० भन्दा बढी अनुसन्धान कृति पनि प्रकाशित भएका छन् ।

सिद्धार्थनगर नगरपालिका वडा नम्बर ७ नारायणस्थान स्थायी घर भएका भण्डारीले भैरहवा माध्यमिक विद्यालयबाट २०३६ सालमा एसएलसी र पक्लिहवा क्याम्पसबाट आइए पास गरेका थिए । उनले स्नाकोत्तर र विद्याबारिधी पुर्ण छात्रावृत्तिमा एशियन इन्सीच्यूट अफ टेक्नोलोजि थाइल्यान्डबाट गरेका हुन् ।

भण्डारीको नार्कमा नियुक्तीसंगै २०५४ सालताका कर्मचारी हकहितको क्षेत्रमा संगै काम गरेका शोभाकान्त नेपालले कृर्षी अनुसन्धान परिषदको नेतृत्वमा कुशल व्यक्तिको आगमन भएको बताए । शोभाकान्त तत्कालिन समयमा कर्मचारी संगठनको अध्यक्ष थिए भने भण्डारी सचिव रहेका थिए ।